Bureau of Parliamentary Studies and Training, Lok Sabha Secretariat a training turin vawiin khan I&PR Joint Director Pu Lalramliana Chawngte hovin I&PR Officer panga leh Mizoram Journalists Association member 15-te New Delhi panin an chhuak. I&PR Minister Pu Lalruatkima chuan I&PR Directorate-a thlahna hun tawi buatsaihah hun hmangin I&PR Officer leh Journalist te a vailiam a ni.

Pu Lalruatkima chuan I&PR Officer-te leh chanchinbumite a vawikhatna atan Lok Sabha Secretariat-ah training-a an kal thei tur chu a lawmawm tak zet tih sawiin Mizoram tan thil thar tam tak zirchhuah tur a awm tih sawrkarin a hriat avangin an kal na tur sum a tum sak a, ruahmanna a siamsak a ni, a ti. Sawrkar flagship programme SEDP bakah sawrkar project hrang hrangte a chhawrtu tur mipuiin an chhawr ngei theih nan sawrkar hmalakna leh ruahmanna te mipui hnena puangzar leh zirtir thin turin journalist-te an pawimawh, Minister chuan a ti a. Thawhhohna tha leh inpumkhatna a awmnaah chuan ramin hma a sawn a, pawl a thang a, sawrkar hmalakna a chak zel a ni, Pu Lalruatkima chuan a ti. Training-a kal turte duhsakna hlanin Mizoram tan zirchhuah pakhat tal nei tur te, an report atanga mipuite chona thar siam sak tur leh mite lo tih tawh atanga kan ramin a tih ve theih thilte rawn hawn ngei turin Minister Pu Lalruatkima chuan a chah a ni.

MJA President Pu Zonunsanga Khiangte pawhin thu sawiin Mizorama la thleng ngai lo, Lok Sabha hiala training thei tura chanchinbumite a tir chu sawrkar chungah MJA-te an lawm tak zet a, Mizoram Journalist ten rahbi thar an kai a ni, a ti.

Training hi September ni 25 atanga ni 27 chhunga neih tur a ni a, Legislature leh Parliament kaihhnawih hriat tur pawimawh tam tak an zir ang.  Bureau of Parliamentary Studies and Training-ah hian Mizoram Legilative Assembly Member (MLA)-te pawh tum engemawzat training in an kal tawh thin a. Mi thiam rualten Assembly leh Parliament a rorel dan kalphung an zirtir a, ram chhunga State Legislature leh Parliament-a mawhphurhna nei mipui aiawh thlan chhuah te leh official-te tan mai bakah International Training Programme-te thlengin an buatsaih thin a ni.

Attachment

  • Loading attachment...