1581/2026-2027 

Dated Aizawl, the 30 July 2026 : Vawiin khan IPR, P&S Department changtu Minister Pu B. lalchhanzova chuan I&PR Auditorium, Treasury Square-ah, MZP General Headquarters buatsaih, tun hnaia MZU-in a tihchhuah tak Undergraduate Result-a Gold Medalist-te leh College hrang hranga Student Union hruaitu, rank-holder-te leh Hnampual Zirlai Pawl hruaitute lawmpuina leh chawimawina hun chu khuallian niin a hmanpui a. UG Gold Medalist-te hi chawimawina thilpek a hlan nghal bawk.

He hunah hian khuallian IPR, P&S Department changtu Minister Pu B. Lalchhanzova chuan thusawiin, MZP-in pawl hlu leh hlun tak, Mizo Zirlaite Inpui a nih ang taka chawimawina leh lawmpuina hun a buatsaih chu lawmawm a tih thu a sawi a. Minister chuan pawl ang emaw mimal ang pawhin, harsatna leh buaina tawh chiahin, kan nihna tak tak a lo lang thin tih tarlangin, chutiang harsatna tam tak lo pal tlang tawh leh ram leh hnam hmasawn nana huaisen taka lo kal tawh thin MZP chu entawna nei a, mahni hma zawna tihtur awmte theihtawp chhuah leh huaisen taka ti thin turin Zirlai kalkhawmte chu a chah a. Mahni zawn theuhva hma sawn zel turin mahni inhriat chian chu thil pawimawh ber pakhat a ni tih sawiin, inelna sang tawh tak khawvelah dam khaw chhuak ve tur chuan a nuam chin chauh piah lama kal ngamna te, nghenchhan neih loh ngamte chu hlawhtlinna kawng a ni tih hre reng turin a fuih bawk a. Hma lam huna an thil tumte chu lo khirh deuh pawh nise, tlawm mai lo va kal zel tura fuihin, hun khirhte chu ral leh mai tur an ni tih hre chung a, beidawng ve duh ngai lote chu an ding chang tho tho thin tih hre reng turin a chah a. Zirlai kalkhawmte chu an tobul, hnam nunphung leh chindan te ngaihlu fo tura chahin, chumi atana mahni zawn theuhva inbih chiang thin turin a sawm a. Chawimawina leh lawmpuina thilpek dawng zawng zawngte chu an kal zelna turah duhsakna a hlan nghal bawk a ni.

Vawiina MZP General Headquarters-in lawmpuina thilpek a hlan leh a chawimawite hi 10-July-2026-a MZU-in a tihchhuah tak Undergraduate result-a stream hrang hrang pali Arts, Science, Home Science leh Social Works-a Gold Medalist-te, MZU Student Council, Students Bar Council bakah College hrang rhang SU hruaitu hlawhtlinna changte leh Hnampual Zirlai Pawl hruaitute an ni a. Arts-ah hian  Julian Lalfakzuala (Dept-of Economics) (HBC) leh Science-ah Laltluangpuii Jongte (Dept-of Physics)  (PUC)te, Home Science atangin  RS Vanlalmalsawmi  (GZRSC)te leh Social Work-ah David Lalrinsanga (Divine Mercy College)  a mite chu chawimawina hi hlan an ni a. Hemi rual hian College hrang hranga SU hruaitu, MZU result tihchhuah taka hlawhtlinna changte leh rank-holder hialte ni theite bakah Hnampual Zirlai pawl hrang hranga hruaitute hnenah lawmpuina hlan nghal a ni bawk.

Vawiina hun hman hi Pu Sanghmingthanga, MZP Gen Hq Vice President-in a kaihruai a. Pu C. lalhmingsanga, General Secretary chuan report pein kalkhawmte inhmelhriattirna hun a hmang a. Dr. C. Lalremruata, MZP Gen Hq President hnen atangin thusawi ngaihthlak a ni a. Hemi zawh hian Pu lalentlinga, Asst. Gen Secy kaihhruaiin chawimawina leh lawmpuina thilpek hlan nghal a ni a. Pu Rothanliana, Treasurer chuan lawmthu sawiin hun hi a khar a ni.