Information & Public Relations Department leh Mizo Photographers’ Society (MPS) tangkawp buatsaih ‘Chapchar Kut 2018 Photo Exhibition’ chu vawiin khan I&PR Secretary Pu Biaktluanga, IAS-in Vanapa Hall-ah a hawng.
Photo Exhibition hawnna inkhawm I&PR Director Pu David L.Thangliana kaihhruaiah Exhibition hawngtu Pu Biaktluanga chuan I&PR Department leh Mizo Photographers’ Society te inkarah thawhhona tha tak a awm chho zel hi a lawmawm takzet a, kumin atang phei chuan I&PR chu Photographer-te hmasawnna kengkawh zel turin Nodal Department-ah dah a nih avangin a hma aia nasa lehzuala thawhhona neih theih beisei a ni, a ti. MPS-te thiltum zingah Mizote zingah photography tihlar (promote) piah lamah khawvel hmuha Mizo ram mawina leh hnam zerang, zonun mawi takte pholan tih a tel ang ngeiin vawiina photo exhibition hmangin Chapchar Kut chhim tura ram pawn atanga lo kalte pawhin thlalak mawi tak tak kaltlangin Mizoram leh Mizote chanchin an hre lehzual thei dawn a ni, a ti. Chapchar Kut puala Photo Exhibition hlawhtling tak nei thei tura Chapchar Kut Organsising Committee-in an duhsakna chungah leh Art & Culture Department-in phal takin Vanapa Hall an hman tir avangin an chungah lawmthu a sawi bawk.
Mizo Photographers’ Society (MPS) hi ni 4.12.2012 kha Registered Society ni tanin tunah hian member 88 an awm mek a. MPS hnuaiah hian affiliated branch 2 - MPS Serchhip Branch (member 20) leh MPS Champhai Branch (member 24) te an tel bawk. Chapchar kut puala Photo Exhibition hi tum 6 an neihna a ni a, Thalfavang Kut, Hmuifang-ah tum 2 an nei tawh bawk a ni. Sorkar programme pawimawh tam zawkah MPS Member-te chu Official Photographer-ah hman an ni thin a, kumin Chapchar Kut-ah pawh Official Photographer niin ‘Chapchar Kut Lady’ an thlang leh dawn a ni.
Kumin Chapchar Kut Photo Exhibition-ah hian thlalak 361 an phochhuak a, a duh apiang tan en theihin Chapchar Kut chhung zawngin Vanpa Hall-ah thlalakte hi phochhuah reng a ni dawn a ni.
