28th February 2018 zan khan Innovations India buatsaihin Hyatt Regency  Hotel,  Salt Lake City, Kolkota-ah Pu Lal Thanhawla, Chief Minister hovin Magnetic Mizoram Roadshow neih ani. He hunah hian Chief Minister leh Finance Minister Pu Lalsawta ten sumdawnglian rawn fuankhawmte chu Mizoram a sumdawnna - kawng hrang hranga awm mek leh awm chho thei tur te an sawipui a ni.

Hei hi Magnetic Road show vawihnihna a ni a; a hmasa zawk chu Delhi-ah neih tawh niin Mizoramah a tlanngkawmna leh a pui ber tur, Magnetic Mizoram Summit nei tura hmalak mek a ni.

Magnetic Mizoram Roadshow ah hian Chief Minister Pu Lal Thanhawla chuan Magnetic Mizoram CEO Summit cum Investors meet Aizawl-ah April 20-21, 2018 ah neih tum anih thu leh chumi hunah chuan corporates leh investors te Mizoram ngei a lokal turin a sawm a. Mizoram sawrkarin NEDP hmangin chak taka ram hmasawnna atana hna a thawh thu leh, chumi tihlawhtling lehzual tura corporates atanga investment mamawhna a len avanga sector hrang hranga Mizoram potential neih dan rawn zirchiang turin a sawm. Mizoram economy chak taka athan mek avang leh sawrkar policy kalpui chhoh zel tur thlirin sector hrang hranga investment hlawk taka kalpui theih anih ngei a rinthu a hrilh bawk. Mizoram chu India ramah hmasawnna thang chak ber zingah a lang thei chu lawmawm a tih thu sawiin chak zawka hmasawnna kalpui zel tura Mizoram Sawrkar hnathawhna-ah kawng hrang hranga corporate te nen thawhdun a tul thu sawiin corporate leader te, ram hrang hrang palai aiawh te leh investors kalkhawm te Mizoram hmasawnna atana thawhhopuiah a sawm a ni. Chief Minister chuan Mizoram chu State ralmuang ber zing ami niin leh mipui tanrualna hmun ani a, investors tan kawng zau tak a inhawn theih a beisei awm tiin kalkhawm te Magnetic Mizoram Summit a tel ngei turin a sawm ani.

Planning Minister Pu Lalsawta pawhin thu sawiin Mizoram sawrkarin  New Economic Development Policy duangin ram hmasawnna chak taka kalpui tura hmalakna hrang hrang tarlangin sawrkarin beiseina lian tak a neih thu a sawi a. Investor te nena tandun a theih  chuan hmasawnna a chak leh zual  a beisei tih a sawi a. Mizoram hmasawnna atana an thawhpui ngei a beisei thu a tarlang bawk a nu. Investor-ten tanpui an ngaihna leh thawhdunna tura ruahman tul awm reng reng-ah sawrkar a inhawn thu sawiin Mizoram dinhmun nasa taka chawikang turin private investment a pawimawh dan a tarlang bawk. Minister chuan investor te hnenah Mizoram tun dinhmun chauh thlir lovin Mizoram in potential kan neih te thlir tel turin a chah bawk ani.

Magnetic Mizoram  Road Show hian sumdawngte ngaihven leh hlut a hlawh hle a. Mizoram rawn tlawh leh rawn zirchian tum tam tak an awm nghal a. Hmalak thuai inbeiseitu zinga a lian zual Sungivity Enterprise Pvt. Ltd., partner of Energo Group of Companies chuan  Mizoram MW100 Solar Power Plant MW 200  thlenga tihlen chhoh theihtur rawn bun tura hmalak tumna  Rs 1000 cr project a lian atan,  Letter of Intent(LOI) chu Chief Minister hnenah a hlan nghal a ni.

He roadshow ah hian Dr C. Vanlalramsanga, Planning Secretary chuan Mizoram chanchin leh economy dinhmun tlangpui a lem nen entirin presentation a pe a. Investors ten an thlir thiam theihnan 3P framework - Performance, Potential leh Possibility hmangin sector hrang hranga imvestment opportunities a tarlang ani.  Pu Biakthanmawia Pautu, Director, Tourism pawhin Mizoram Tourism destination a siam tura hmalakna kawng hrang hrang leh private investor te pawimawhna a lem nen entirin presentation a pe bawk a ni.

Magnetic Mizoram Roadshow ah hian kal an tha hle a. Ram aiawh palai Consul General thahnem tak an tel a, Industries lar tak tak CEO leh MD te thahnem tak tellin film makers, producers leh tour operators thahnem tak an tel a ni.

drive.google.com/file/d/1tNP50SztPIBoF8apxHl9fdJ_WzLE-vtz/view