Mizoram Institute of Medical Education & Research (MIMER) a, Department/Speciality 17 atana zirtirtu sang lam – Professor(post 4), Associate Professor (post 17) leh Assistant Professor (post 18), a vaia post 41, lakna tur Interview chu nimin leh vawiin khan Mizoram Public Service Commission (MPSC) in Guwahati-ah tul zawng zawng buaipuiin hma an la.

Mizoram pawmna MPSC in Interview a tih hi MPSC history ah a vawikhatna niin MIMER post, a bik takin zirtirtu faculty) post hnawhkhah hi thil hmanhmawhthlak tak anih avangte, Chief Minister Pu Lal Thanhawla hova meeting in Single Clearance Window kaltlanga he thil hi kalpui rem an lo tih tawh avangte leh Health Minister Pu Lal Thanzara pawh in MPSC hotute, faculty lak hi hmanhmawhpui tura a ngenna avangte MPSC chuan Interview hi Guwahati a tih chu rem an ti a, chumi zulzuiin nimin leh vawiin khan Interview hi neih a lo ni ta a ni.

MPSC lam atangin Chairman Rev. Zosangliana Colney, Member Pu V. Lalremthanga leh Pu C. Laldina te, Secretary Pu Lalzirmawia Chhangte leh thawktu dang 3 leh Health & Family Welfare Department atangin Dr. Jane Ralte, SNO, MIMER leh a thawhpui dang 3 te hian Guwahati ah Interview-a tul zawng zawngte chu an buaipuiin an kalpui a ni.

MIMER a Faculty Post-te dilna(advertisement) hi ramchhung national newspaper ah te chhuah niin heng post 41 atan hian ramchhung hmun hrang hrang atangin dilna 76  dawn a ni a, chung zinga mi 44 te chu nimin leh vawiin khan MPSC hmaa Guwahati ah inlan in Interview an hmachhawn a ni.

MIMER atan zirtirtu dang – Senior Resident, Junior Resident leh Demonstrator lakna tur Interview chu MPSC in March ni 8 leh 9 ah te Aizawl ah an ti leh dawn a ni.

Nimin leh vawiin Interview result hi vawiin tlaiah MPSC chuan an tih chhuah beisei a ni.