4072/2024-2025

Dated Aizawl, the 4th February, 2025: Vawiin chhun dar 12:00 khan I&PR Secretary Pi Betsy Zothanpari Sailo chuan Lianchhiari Rûn, DIPR New Building, Treasury Square, Aizawla din Mini Theatre chu Khuallian niin a hawng.

Hawnna puala inkhawm tawi buatsaihah Khuallian Pi Betsy Zothanpari Sailo chuan Lianchhiari Rûn-a Mini Theatre buatsaih hawn theiha peihfel a ni chu lawmawm tiin, a hlawhtlin theih nana thawktute hmalakna ropui a tih thu a sawi a. Harsatna tam tak kara Lianchhiari Rûn sak hna kalpui a nih dante tarlangin, Mini Theatre chu lemchan lama tuimite hmasawnna tura chhenfakawm tak a ni, a ti a. Tunhnaiah Mizoramin film siam kawngah nasa taka hma a sawn leh mipuite'n an hlut chho zel chu lawmawm a tih thu a sawi a. Film tihhmasawn nana apps siam a ni leh film tihhmasawn kawnga Sawrkarin theihtawp chhuah a inhuam chu thil lawmawm tak nia a hriat thu a sawi a. Nodal Department leh film siam lama tuimite inkara thawhhona tha chhawmnun a pawimawh thu sawiin, Mizote'n lemchan lama hma kan sawn zel theih nana ngaihtuahna senhopui atan kalkhawmte chu a sawm nghal bawk a ni. 

Vawiin Lianchhiari Rûn Mini Theatre hawnna hun hi Pu C.Lalnunkima, Director, Department of Information and Public Relations chuan a kaihruai a. Pu Pratap Chhetri, Deputy Director & Nodal Officer, Visual Art chuan Mini Theatre din chhoh dan leh hmalak zel dan tur report a pe a. Film siamtu lam leh sawm bikte atangin  thusawi tawi ngaihthlak a ni a. Lianchhiari Rûn chungchang tarlanna documentary tawi thlirho a nih hnuah hun hman hi khar zui a ni.

Report-a tarlan a nih danin vawiina hawn tak Mini Theatre, Lianchhiari Rûn hi mi 100 len theihna tura duan niin, laser projector leh bungraw changkang tak taktea thuam a ni a. Vawiin atang hian film siamtute pawhin I&PR Department-ah dilna thlen hmasain an film siamte chu Mini Theatre-ah hian man chawiin an  chhuah thei tawh dawn a ni.