4073/2024-2025

Champhai, 4th February 2025: Vawiin khan Naupang kum 1 atanga kum 19 inkar ten rulhut an pai lohna tura rulhut hlo pek beihpui leh rulhutin a nghawng thalote inhrilhhriatna hun, National Deworming Day (NDD), 2025 thawhkhatna chungchang ngaihtuahin Champhai District Level Coordination Committe on National Deworming Day (NDD) chu an Chairman, Bawrhsap Pu VL Remliana kaihhruaiin DC Conference Hall, Keifangtlangah an ṭhukhawm.

He hunah hian Dr. PC Lalhmingliana, Sr. CMO, District Level Coordination Committe on National Deworming Day (NDD) Convenor ni bawk chuan National Deworming Day hman chhan tlangpui te sawifiahin, kumin a he hun hman leh dan tur ruahmanna awm te a hrilhfiah bawk a. National Deworming Day 2025 thawhkhatna hi February ni 10, 2025 aṭanga kalpui tur niin, Champhai District a naupang kum 1 aṭanga kum 19 inkar mi 54010 te hnenah rulhut hlo pek chhuah tum a ni a. Rulhut hlo hi Anganwadi leh sikul aṭanga pek chhuah tur niin, sikul kal tawh lo te chu ASHA thawktu ten an inah an kal chilh dawn a ni. NDD thawhkhatna bul ṭan ni February ni 10 a rulhut hlo ei ve hman lo te tan February ni 17 khian ‘Mop Up Day’ neih tura ruahman a ni bawk. Rulhut hlo ei avanga harsatna awm thei te veng turin Adverse Event Management & Emergency Response Team ruat an ni a. Rulhut hlo ei ṭhatna leh rulhut nghawng ṭha lo te inzirtirna beihpui chu social media leh local cable tv te bakah Anganwadi leh sikulah te neih tura ruahmanna siam a ni bawk.

He hunah hian National Deworming Day 2024 hman dan thlirletna pawh neih a ni a. NDD 2024 ah khan Champhai (Undivided) huamchhunga sawrkar enkawl sikul (Govt & Govt Aided) 321, mimal enkawl sikul (Private) 118 leh Anganwadi Centre 290 a naupang 52800 te bakah Anganwadi leh sikul kai lo naupang 1377, an vaiin naupang 54177 te hnehah rulhut hlo pe chhuak tura ruahmanna siam a ni a. Naupang 53908 te hnenah rulhut hlo hi pek chhuah theih niin, hei hi za zela 99.50% a ni.

National Deworming Day thawhkhatna hawnna hi February ni 10 khian Govt. Vengthlang Middle School-ah Champhai Bawrhsap Pu VL Remliana, District Level Coordination Committe on National Deworming Day (NDD) Chairman ni bawk hova neih tur a ni a. NDD 2025 thawhhnihna hi August thlaa neih tura ruahman a ni bawk a ni.

Vawiin ṭhutkhawmah hian NDD hnuaia line department- CMO,RD, DEO, WCD, PHED, DIET, NHM leh I&PR Department aiawhte an tel a ni.