4074/2024-2025

Dated Aizawl: the 04 February 2025 : Vawiin chawhma dar 11:00 khan National Health Mission hnuaia Programme pakhat, National Programme for Prevention & Control of Cancer, Diabetes, Cardiovascular Diseases & Stroke (NPCDCS) chuan United by Unique" tih thupui a hmangin khawvel puma Cancer dona ni "World Cancer Day 2025" chu " Taxation Auditorium, MINECO-ah an hmang a. He hun hi Dr.Vanlalsawma, Principal Director, H&FW Department chuan Khuallian niin a hmanpui.

He hun puala inkhawmah hian Khuallian Dr. Vanlalsawma Principal Director, H&FW chuan thusawiin, Cancer natna veite enkawl kawngah chuan enkawltu leh damlo chenpui tete chu an pawimawh hle tih a sawi a. Chumi kawngah chuan thawktute pawh nasa leh zual a tan la tura fuihin, Cancer natna chuan kiam lam a pan zel theihna tura mahni invawn kawnga tan la turin kalkhawmte chu a chah nghal bawk a ni.

Hun hman hi Dr.Eric Zomawia, Mission Director NHM State NHM-chuan kaihruaiin kalkhawmte lo lawmna thu a sawi a. kumin World Cancer Day thupui "United by Unique" hmangin Dr.Zirsangliana Chhangte, Gynecologist Oncologist. MSCI Zemabawk chuan zirtirna a pe a. Dr. Jeremy L.Pautu, Director, MSCI, Zemabawk pawhin, Mizoram State Cancer Institute chungchang report pein, Mizorama Cancer enkawlna Cobalt Therapy chu 4th February 1998-a neih tan a nih dante, TCCC khawl thar pawh 4th February 2024 a neih a nih dante a tarlang a. Hemi zawh hian Dr. Catherine Lalmuanawmi State Nodal Officer, NP-NCD chuan lawmthu sawiin hun hi a khar a ni.

World Cancer Day hi khawvel pumah kum 2000 atang khan hman tan tawh niin, Mizoramah erawh chuan kum 2014 atang khan hman a ni thung a. He Programme kalpuitu NPCDCS hian Mizoram chhungah Population Based Screening chu tunah hian a kalpui mek a ni.

Mizoram State Cancer Institute-in a tarlan danin kum 2023 chhung khan Cancer Hospital Zemabawka Cancer natna vei inziak lut mipa leh hmeichhe belh khawm chu 2100 an chuang tawh a ni.