957/2026-2027

Dated Aizawl, the 11th June, 2026: Vawiin khan Information, Public Relations, Printing & Stationery(IPRP&S) Minister Pu B. Lalchhanzova leh Arunachal Pradesh University-a Mass Communication Post-Graduate 2nd Semester zirlaite chuan Minister pisaah inkawmhona hun an nei a ni.

A pisaa Arunachal Pradesh zirlaite an lo kal avang leh anmahni nena inkawmna hun nuam tak an neih theih avanga lawm thu sawiin, Minister Pu B. Lalchhanzova chuan hmarchhak state thalaite zingah hian thiamna leh theihna tam tak a awm a ni tih a sawi a; chutiang thiamna chu an hman chhuah theih nan rilru zau zawka ngaihtuahna hman te, an ngaihdan tlang taka sawichhuak ṭhin tur te, mahni inrintawkna neih pawimawh zia te leh mahni comfort zone atanga chhuah a pawimawh zia a hrilh a. Hemi bakah hian Minister chuan Arunachal Pradesh zirlaite chu hmarchhak state dangte nen thawhhona tha nei a, inunauna leh inpumkhatna rilru nei reng turin a chah bawk a; hei hian an mahni state chauh ni loin Hmarchhak bial leh India ram pum hmasawnna a thlen theih thu a sawi bawk a ni. Minister chuan zirlaite chu an hmalam hun atan duhsakna hlanin, eng lai pawhin puih an ngaihna apianga pui tur leh thawhho pui turin Mizoram leh a mipuite an inpeih reng a ni tih a hrilh bawk.

PIB Aizawl Head of Office Dr. Rajeev Lourembam chuan Central sector-a journalism chanchin a hrilhfiah a. Mass Communication an zir zawh hnua eizawnna kawng hrang hrang awm theite zirlaite hrilhin, tawnhriat ngah lehzual nan leh industry mamawh dante mila an thiamnate tipung zel turin zirlaite chu a chah a. Zalen chanchinbu editor leh Mizoram Journalist Association President Pu Vanlalrema Vantawl pawhin Mizoram-a journalism kalphung chu zirlaite hnenah a sawifiah bawk a ni.

PS to Minister Pu Remlalliana Hnamte pawhin thu sawiin, Social media avangin mi zawng zawng hi journalist ang an ni vek tawh tih a sawi a. Social media hian thatna tam tak a neih lai hian that lohna pawh a nei a. Hnam leh nihna (identity) hmanga khawtlang inthenna siam thei a ni tih sawiin, Arunachal Pradesh leh Hmarchhak bialah pawh hian hnam leh nunphung hrang hrang tam tak a awm avangin, fimkhur taka hma la a, inpumkhatna vawng him turin zirlaite chu a chah a ni.

He hunah hian The Frontier Despatch editor Pu Adam Saprinsanga pawhin chanchinbu khawvela a thil hriatte leh tawn tawhte zirlaite hnenah a sawi a. Journalism leh media hmang hian an bial ziarang, hnam nun, danglamna leh nihna dik takte chu khawvel hmaah an pholang thei a, pawn lam mipuite thlir dan pawh a ṭha zawngin an thlak danglam thei a ni tih hrilhfiahin, zirlaite chu thil eng pawh an tihna apiangah phur taka ti turin a chah a ni.

Vawiin inkawmna hun hi IPRP&S Department Joint Director Pi Mina Zoliani Joute in a kaihruai a. IPRP&S Deputy Director Pu Pratap Chhetri leh thuthar thehdarhtu dangte an tel a ni.