956/2026-2027

Dated Serchhip, the 11^th June 2026: Vawiin khan Green Mizoram Day, 2026 hawnna Serchhip DC Pisapui Hall ah hman niin, Serchhip District Bawrhsap Pu Paul L Khuma chuan khuallian niin a hmanpui. Green Mizoram Day, 2026 thupui atan Trees are green gold, the roots of all life (Thing hi rangkachak anga hlu, Nunna tinreng bul a ni) tih hman a ni.

Khuallian chuan thusawiin thilsiamte enkawl tur hian Pathianin mawhphurhna sang tak min pe a ni, a ti a. Mihringte mamawh tur engkim a siam hnuah mihring hi a siam a, a thilsiam, tha a tih em em te enkawl hi kan mawhphurhnaah a dah a. Kan mamawh leh kan dam khawchhuahna atana pawimawh em em te hi kan kuta awm an ni, a ti. Inmamawh tawn kan nih hriain, thingte an dam khawchhuah nana venhim hi kan mawhphurhna a ni a, kan nunna atana kan mamawh ber boruak thianghlim kan neih theih nan thing a pawimawh bakah, boruak a ti nuam a, nun a tinuam a ni, a ti a. Green Mizoram Day-a thing kan phun thinte an puitlin ngei theih nan theitawpa enkawl a tul thu sawiin, rangkachak ai maha hlu zawk, nunna min petu hi suat lovin enkawl tha zawk ang u, a ti a. Serchhip District chhunga Kangmei venna kawng a thawk tha lawmman a hlan nghal a ni. Lawmman dawngtute chu:

1. Leng
2. E. Lungdar
3. Chhingchhip Mualpui te an ni a.

YMA Chanchinbu kangmei venna thu chhuah kawnga a titha te:

1. Serchhip Kawnpui 'N' Branch YMA
2. Serchhip Hmar Veng Branch YMA
3. Serchhip Chhim Veng Branch YMA te anni.

Dr. C. Vanlalnghaka, Asst. Professor, Department of Zoology, Govt Serchhip College chuan Green Mizoram Day thupui, 'Trees are green gold, the roots of all life" (Thing hi rangkachak anga hlu, Nunna tinreng bul a ni) tih chu a lem nena entirin a sawi a ni.

He hun kaihruaitu Dr. R. Lalnunrenga, DFO & Member Secretary, District Level Committee on Green Mizoram Day chuan Serchhip District chuan Mizoram pumah kangmei venna kawngah an thawhhlawk zia sawiin, lawmawm a tih thu a sawi a. Pu C. Lalhminghlua, Honorary Wildlife Warden kaihruaiin Green Mizoram Day, 2026 thutiam (Pledge) sawi rual niin, hawnna hun hman a nih hnu hian Kikawn leh Keitum inkar kawngpui kamah thing tiak phun a ni.