955/2026-2027

Dated Aizawl, the 11th June 2026: Vawiin khan Health & Family Welfare changtu Minister Pi Lalrinpuii chuan SAD Conference Hall-2, MINECO-a Mizoram State Health Care Society (MSHCS)-in ISO (International Organization for Standardization) certification leh AB PM-JAY Award  a dawn hriatrengna (commemoration) ceremony a hmanpui.

Minister chuan Mizoram State Health Care Society (MSHCS)-in ISO certification mai bakah National Award chi hnih (PM-JAY hnuaiah BEST STATE – Beneficiary Enrollment Award leh BEST PERFORMING SMALL STATE – Highest No. of ‘Bio-Authentication’ done in FY 2025-26 Award) tun hnaia a dawng thei chu a lawmpui thu sawiin, MUHCS tluang taka kalpui a nih theihna tura ngaihtuahna, tha leh zung sengtu zawng zawngte leh CEO leh staff-te inpekna chhuanawm a ti a.  MUHCS (Mizoram Universal HealthCare Scheme) hi Zoram mipui tana scheme chhenfakawm a nih chhunzawm zel theih nan Sawrkar chuan tha thlah loin scheme hmasawnna tur kawng a dap chhunzawm zel dawn, tiin Pi Lalrinpuii chuan a sawi bawk.

Pi Lalrinpuii chuan MUHCS 2.0 chungchang sawi zauvin empanelled hospital (sawrkar damdawiin thawhpui) mai ni lova MUHCS hmanga damdawiin danga enkawlna dawn theihna tur Emergency criteria (tehna) pathum -:

1. Accident avanga emergency-a surgery (inzaipui) neih a ngaihin 

2. Rikrum thil avanga nunna chhanna tura surgery mamawh avangin

3. Damlo na zual ICU-a admit ngai nghalte tan siam a ni a. Empanelled damdawiin nilova inenkawlna senso hmuh let theih leh theih loh dan hriltu a nih avangin heng criteria pathumte hi hrechiang turin mipuite a chah a ni.

Sawrkar chuan April Ni 1, 2026 hnulamah MUHCS bill atan cheng ₹Vaibelchhe 22.7 (Mizoram chhunga inenkawlna: ₹Vaibelchhe 13.45 leh Mizoram pawna inenkawlna: ₹Vaibelchhe 9.2) dawmdawiin hnenah a pe chhuak tawh a. A hun taka damdawiin hnena bill pek chhuah hi sawrkarin a ngai pawimawh a, khaihlak awmloa dawmdawiin hnena bill pek chhuah zel a nih theih nan sawrkar chuan theihtawp a chhuah, a ti a. Kum 2025-2026 chhung atana cheng ₹Vaibelchhe 50 budget-a sawrkarin a dah chu kum 2026-2027-ah cheng ₹Vaibelchhe 130-ah a tihpun thu Minister chuan a sawi bawk.

H&FW Minister chuan MUHCS chungchanga mipuite’n zawh chian duh an neih chuan ‘MUHCS Chhawntu’ Call Centre an kalpui mek thu leh he Call Centre hi tangkai taka mipuiin an hman theih a duh thu a sawi a. MUHCS nihphung leh MUHCS chungchanga sawrkar thu chhuak hrang hrang mipui ten an hriat zung zung theih nan Mizoram State Health Care Society official website (mshcs.mizoram.gov.in) chu tlawh thin turin mipuite a chah bawk a ni.

MUHCS hmanga state pawn empanelled hospital-a enkawlna mamawh ten Medical Refer Board an paltlang hmasak a ngaih thin thu sawiin, Refer Board awmlohna khuaa cheng ten awlsam zawka Refer Board an hmachhawn theihna turin sawrkar chuan district tina Medical Superintendent-te kaihhruaina hnuaia virtual-a damlo ten Medical Refer Board an hmachhawn thei tawh thu a sawi a. “MUHCS hi Zoram mipui tana scheme thlamuanpui tlak ni chhunzawm zel turin Mizo mipui zawng zawngte thlawpna leh thawhpuina ka dil a. Damloh nikhuaa inenkawlna senso phurrit ni thin leh chhungkaw tam tak tana lungngaihna thlentu ni thin chu MUHCS hmanga sut kian a nih zel theih ka beisei a ni,” tiin Minister Pi Lalrinpuii chuan a sawi bawk.

Mizoram State Health Care Society-in ISO certification a hmuh hi Mizoram Health System Strengthening Project(MHSSP) hnuaia hmalakna a ni a. He ISO 9001:2015 certification a hmuh hi Quality Management System  tehfung hrang hrang a paltlang tihna a ni.

Vawiin ceremony-ah hian H&FW Dept. Commissioner & Secretary Pi K. Lalrinzuali chu chairperson niin he inkhawm hi a kaihruai a, MSHCS Chief Executive Officer Dr Lalhriatzuali Ralte chuan Keynote address neiin, Reels Competition-a lawmman dawngtute: Rody Lalthanzuali, Lalhminghlui leh Vanlalchhuanga hnenah Minister chuan lawmman a hlan bawk a. He hunah hian World Bank task team atangin Team Leader Dr. Navneet Kaur leh team member dangten rawn telpuiin Dr Lalruatkima Pachuau leh Dr Lalbeiseia Renthlei te atangin MSCHS-in ISO Certification leh AB PM-JAY award an dawnna kalkawng thlirletna thusawi ngaihthlak a ni bawk.