954/2026-2027

Dated Aizawl, the 11th May, 2026 : Rural Development & Administration Department Minister Prof. Lalnilawma chuan vawiin khan Secretariat Conference Hall - 1-ah Mizoram sawrkar leh Bharat Rural Livelihoods Foundation (BRLF) te bultumin ‘Enabling Sustainable Livelihoods in Mizoram’ (Mizoramah Eizawnna Ngelnghet Din Theih Dan) sawihona a hmanpui.

Prof. Lalnilawma chuan BRLF Team te chu zirchianna tha leh fiah tak an neih theih avangin lawmthu a hrilh a, hna tha thawk tur chuan ruahman lawkna (plan) tha a pawimawh a, BRLF te zirchianna chuan Mizorama hna thaw dan tur ruang am siam kawngah pawh a puih ngei a ring. ‘Sustainability’ chu a ngaih pawimawh thu sawiin kalkawng thui tak zawh tur a la awm, a ti a; eizawnna ngelnghet nei turin tui hna neih that a tul a, chuvangin kan tui hna te kan venhim a ngaih thu a sawi bawk. Eizawnna ngelnghet din kawngah political will a pawimawh rualin, mipuiten an ta anga an ngaih theih turin project siam a pawimawh ber thu a sawi a ni.

Dr. KC Lalmalsawmzauva, Adviser to the Chief Minister chuan Bana Kaih hnuaia eizawnna ngelnghet nei thei tura Mizoram sawrkar hmalakna hrang hrangte sawi fiahna hun a hmang a. Bana Kaih hnuaiah progress partner 1399 (za zela 36 chuang) te chuan industry kaihhnawi an thlan avangin Mizoramah pawh industry lian a awm ve thuai a besei thu a sawi. Kut hnathawktute’n an thlai hralhna tur pawh a ngaihtuah sak zel a, hei hian Bana Kaih chu market driven focus a nih zia a tarlang, a ti.

Pu Kuldip Singh, BRLD-a Chief Executive Officer (CEO) chuan Mizoram sawrkar hnenah lawmthu a sawi a, Mizoram chu leilung hausakna ngah tak ram a ni a, chu chu eizawnna ngelnghet din nan a pawimawh thu a sawi. BRLF chu kum 2013 khan sawrkar laipuiin Ministry of Rural Development hnuaia independent society a din a ni a, state sorkar hrang hrang leh tualchhung mipui pawl (community based organisations) te nen thawkhoin hma an lak thin thu a sawi. BRLF leh Mizoram sawrkar chuan nikum 2025 khan inremna (MOU) an lo ziak tawh a ni.

Dr. Aruna Pandey leh Dr. Syed Rouhulla, BRLF atanga lo kalte chuan Mizorama an zirchhianna te sawi zauna hun an hmang a. District pangaah (Aizawl, Lunglei, Champhai, Mamit leh Saitual) zirna hi an kalpui a, chhungkua (household) 622 leh mihring 2710 te an zirchianna atangin Mizoramah eizawnna ngelnghet din a nih theih nan marketing (hralh chhuah) lamah tan lak a ngaih thu te; sik leh sa inthlak hmachhawn thei tura lo neih dan (agricultural practices) her rem te; eizawnna, a bik takin horticulture-ah hmeichhiate hnathawh leh sum hmuh (earning) inthlau lutuk tih ziaawm te leh Mizorama mipuite leh tlawmngai pawlte nena thawhhona tha tak awm sa zulzuia BRLF chuan hnathawh a tul thu an sawi.

Vawiin programme-ah hian Pu V. Lalengmawia, Rural Development & Administration Department Additional Secretary bakah MzSRLM hotute leh department hrang hrang - Agriculture, Horticulture, Fisheries, Animal Husbandry and Veterinary Department leh department hotu dangte an tel a ni.

Pu Brajesh Dubey, BRLF Head (Programme)  chuan sawihona (discussion) chu kaihruaiin, lawmthu sawina in programme chu a khar a ni.