857/2026-2027

Aizawl the 5th June, 2026: Vawiin khan IPRP&S Minister B. Lalchhanzova chuan emPOWERu, Training and Development Institute, hawnna hun Kulikawna an Institute-ah a hman pui.

He hunah hian Minister chuan Mizo ten mahni invawnna kawngah leh mahni intundinna kawnga hmasawnna tur kawng kawhhmuhtu an awm chu lawmawm a ti a, hetiang lam Mizo ten kan hawi chho zel hi tha a tih thu a sawi. Sawrkar hna pawh a that rualin mahni a intundin tumna lam kan hawi zel hi a lawmawm a, hetiang kawnga  kaihruaitu leh zirtirtu an awm ta hi  lawmawm a tih thu a sawi a ni. Pu B. Lalchhanzova chuan soft skills pawimawh zia sawiin tunlai khawvelah chuan eng hna pawh thawk dawn ila, midang nen kan indawrna kawngah hawihhawm taka indawr zel a tul thu sawiin hetiang zirna Mizorama kan nei ta chu lawmawm a tih thu a sawi.

emPOWERu hawnna inkhawm hi an Founder Director Pi Golda Dell Zohmangaihi chuan a kaihruai a. Thu sawiin, he Institute hian a tum ber chu Mizo mipui ten kan eizawnna kawnga hmasawnna tur, min lo dawrtute kan lo dawnsawn dan tha zawk te, kan hnuaia hnathawk te kan chhawr dan tha zawk te, kawng hrang hranga hlawhtlinna leh changkanna kawng kan zawh theih na tura inzirtir hi a ni a ti. Puitlin hnuah chauh ni lo, Middle School level  atanga inzirtir tan a pawimawh thu a sawi a, an thil tum a hlawhtlin chuan mahni a eizawng te leh mi hnuaia thawk te zawng zawng pawh sang takah a hlang kai thei dawn a ni, a ti.

emPOWERu Training Course hian Communication Skills, Leadership Skills, Influencing, Personal Skills, Interpersonal Skills, Creativity, Professional Skills leh a dang tangkai tak tak a huam dawn a. Zirlaite dinhmun hrechiang hmasa in an mamawh ang zawnga inzirtir hi an tum lian tak a ni a, hengah te hian zirlaiten hmasawnna tamtak an nei thei dawn a ni.