858/2026-2027

Date Kolasib the 5th May 2026: Vawiin khan Mizo Zirlai Pawl (MZP), Kolasib Headquarters buatsaihin Parish Hall, Kolasib-ah kumin HSLC leh HSSLC exam-a zirlai tithate chawimawina  neih a ni a. He hunah hian Mizoram Legislative Assembly Deputy Speaker, Pu Lalfamkima chu Khuallian a ni a, Kolasib Deputy Commissioner Pu H. Dolianbuaia chu Khualzahawm a ni.

Khuallian Pu Lalfamkima chuan zirlai tithate chawimawi nachang MZP in an hria chu lawmawm a tih thu a sawi a. Zirlaite chu zirlai an nihlai atanga tum mumal tak nei a, kawm tur thian thliar thiam a pawimawh thu a chah a . "Tuna thian inkawmngeih em em te pawh nakinah chuan kan dinhmun a la inang vek dawn lo a. Tunah tha tak taka pass kan awm rualin, kan tum tihlawhtling turin kawng a la thui hle a, inthlahdah mai lova tan lak chhunzawm zel a ngai a ni," a ti.

Sawrkarin hna lak kawngah thiamna tak tak neite chu a tling ngei turin a duh thu leh, dan ang thlapa advertisement hmanga hna lak a nih thin thu a sawi a. Zirna mai bakah hna a zirin fitness a pawimawh thu sawiin, "Tun hnaia lak tur Police, Home Guard leh Territorial Army-ah te pawh physical fitness ngaih pawimawh a nih avangin thalai tam takin ngawrh takin exercise an la a, hei hi thil lawmawm tak a ni," a ti bawk.

Zirtirtute inpekna chu chawimawi phu leh fakawm a tih thu sawiin an thawhrimnaah lawmthu a hrilh a. "Zirna chu lehkha thiamna ngawr ngawr piah lamah kan hawiher leh kan nunphung min chawikangtu a ni tih kan hriat reng a pawimawh a ni," a ti.

Khualzahawm Pu H. Dolianbuaia pawhin thu sawiin, zirna chu kawng engkima thanlenna kim a nih thu a sawi a. Mi zawng zawng chu competitive exam-a tling tura beisei theih an nih loh thu leh line hrang theuh kan neih thu a tarlang a. "Kan line theuhah hlawhtling taka kan thawh a ngai a ni. Tunlaiah chuan Sawrkar hna kher beisei lovin, infiamna emaw, sumdawnna emaw, eng pawh ni se hlawhtling ngei tura kan beih a ngai a ni," tiin zirlaite chu hlawhtlinna chang ngei turin duhsakna a hlan a ni.

Vawiin inkhawmah hian HSLC exam-a Distinction-a pass mi 21 te hnenah lawmpuina thuziak (citation) hlan an ni a. Heng bakah hian HSSLC-a zirlai tithate hnenah lawmpuina thuziak hi hlan an ni bawk.

He chawimawina inkhawm hi MZP Kolasib Vice President, Pu Lallawmzuala Sailo chuan a kaihruai a, Secretary Pu R.K. Lalchhuanawma hnen atangin report tawi ngaihthlak a ni. He hunah hian zirlai bakah an nu leh pa thahnem tak an kalkhawm a ni.