648/2026-2027  

Lunglei, 2026 Ṭomir thla ni 21: IPRP&S Minister Pu B. Lalchhanzova chuan vawiin khan Lungleia a department chan hrang hrang – Information, Public Relations, Printing & Stationery (IPRP&S); Food, Civil Supplies & Consumer Affairs (FCS&CA) leh Land Revenue & Settlement (LR&S) hmunhma te tlawhin, thawktute nen department hma lakna leh thil pawimawh hrang hrang an sawi ho.

IPRP&S Minister Pu B. Lalchhanzova hian Lunglei District Court sakna atana Mizoram Government Press awmna, Lunglawna P&S hmunhma leh building nena ram inthleng dilna leh rawtna awm mek avangin vawiin khan Government Press hi a hmunah a en a. HPC Vice Chairman Pu V. Malsawmtluanga, IPRP&S Secretary Pi Betsy Zothanpari Sailo, Joint Secretary Pu Lalremruata Ralte, P&S Controller Pu Benjamin Lalzama te bakah, LMC councillor-te, department official-te leh political party hruaitute'n an ṭawiawm.

Minister ho hian P&S hmunhma en ho a nih bakah, District Court hmunhma leh Rahsivenga District Court ram tura ruahmante en ho a ni bawk a. District Court-ah District and Sessions Judge Pi R. Lalduhawmi hovin Court official-te leh Bar Association hruaitute'n lo dawngsawngin, hmunhma inthleng rawtna chungchanga thil pawimawh hrang hrang an sawi ho.

Government Press, Lunglawn an tlawhnaah Minister chuan Printing & Stationery ram, Lunglawna mi chu District Court building sakna atan Bar Association te'n an dil thu leh indawrna a kal mek thu sawiin, Bar Association chuan Aizawlah Chief Minister leh amah pawh an hmuh tawh thu a sawi a. Sawrkar kalphungah chuan khawi hmun pawh ni se, ram leh mipuite tana thil ṭha zawk a thlen theih dawn chuan department leh department karah ram inthleng te chu a thleng ṭhin tih sawiin, Aizawl aṭanga, "A ṭha alawm," tih ngawt chi a nih loh avangin P&S Office Lunglawn chu a hmuna hmuh ngei duhin a tlawh tih a sawi.

Tunah hian sawrkar chuan Bar Association hnenah a hlan ngei ang tih a la awm lo tiin, Minister Pu B. Lalchhanzova chuan en ho va, sawi ho va, ngaihtuah zel a nih tur thu leh Chief Minister hnenah pawh a ṭul dan azirin report theh luh a nih tur thu a sawi a. Sawrkarin a duh ber chu khawi ram pawh ni se, ram tana ṭhatna tur a nih chuan hlan phal mai tur tih a nih thu a sawi.

IPRP&S Minister chuan P&S chu department lo inbun nghet tawh an nih thu leh ram tana service lo pe reng tawh an nih thu sawiin, changtlung zawka P&S chu kalpui tum mek a nih thu te, Lunglei Printing & Stationery office pawh a ṭiavai zawng ni lo, a ngelnghet zawnga kalpui tum mek a nih thu te a sawi a. P&S chuan sawrkar document pawimawh – election leh assembly thil bakah, sawrkar thil pawimawh tam tak an buaipui thu sawiin, kuminah pawh Education Department nen thawk hovin zirlaibu (textbook) an chhu tih a sawi a. Zirlaibu chu sikul ṭan hmaa chhut zawh vek a nih thu leh Mizo firm an hman thu te, a lehkha phek (paper quality) pawh a ṭhat thu te a sawi a; stationery item hrang hrang pawh quality ṭha zawk leh man tlawm zawka an hralh chhuah reng thu a sawi.

Lunglei District Court-a inkawmna tawi buatsaihah Minister Pu B. Lalchhanzova chuan department leh department inkarah kar awl awm lo va, thawh hona ṭha tak neih chu ṭul a tih thu a sawi a. A department chana thawktute rilru leh ngaihtuahna a ṭawmpui thu leh department tan leh ram tana ṭha ber tura hma lak zel a duh thu sawiin, Judiciary tihchak pawimawhna te, P&S tihchangtlunna tur leh tuartu leh nek chep zawk an awm lohna tur te ngaihtuah chung zela ṭha tak leh inpawh tlang taka sawi ho zel ṭha a tih thu a sawi.

He hunah hian Lunglei HPC Vice Chairman Pu V. Malsawmtluanga, IPRP&S Secretary Pi Betsy Zothanpari Sailo, District & Sessions Judge Pi R. Lalduhawmi leh Bar Association Lunglei Sub-Headquarters President Pu ZD Lalnunsanga te pawhin thu an sawi.

Minister hian DCSO Office, Revenue Office leh I&PR Office te a tlawh bawk a. Office hmunhma fang kualin, thawktute nen office mamawh leh ṭul hrang hrang an sawi ho a ni.