649/2026-2027

Lunglei, 2026 Ṭomir thla ni 21: Vawiin khan Lunglei District Level Standing Committee chu an Chairman, District Election Officer Pi Navneet Mann kaihhruaiin Lunglei DC Conference Hall-ah an ṭhu khawm a. Election official-te, ERO leh AERO-te, NGO hruaitute leh political party hrang hrang ai awhte telin, Lunglei District-a Special Intensive Revision (SIR) kalpui dan tur an sawi ho.

Chairman Pi Navneet Mann chuan Special Intensive Revision kalpui turah Lunglei District chu a inpeih fel thawkhat tawh tih sawiin, a hlawhtlinna turin political party leh NGO-te an pawimawh thu a sawi a. Roll dik leh felfai tak nei turin official-te leh NGO leh political party-te thawh ho ṭhat a ṭul thu sawiin, an ṭawiawmna leh thawhpuina a ngen nghal bawk.

Lunglei District-a SIR kalpui turah hian ruahman lawk dan chuan Booth Level Officer (BLO)-te tan Assembly Constituency tin a hrang zelin training buatsaih a ni dawn a. BLO training hi May ni 26, 2026-ah zawh tura ruahman a ni a. ECI hunbi ruat angin May ni 30, 2026 aṭanga June ni 28, 2026 chhungin BLO-te chu in tinah kal chhuakin, Enumeration Form sem, dah khah leh khawn khawm hna an thawk dawn a ni.

Electoral Roll hi a thar hlaka buatsaih a nih dawn avangin Enumeration Form theh lutte hming chauh Draft Roll-ah a chuang dawn a. Draft Roll hi June ni 5, 2026-ah tihchhuah tur a ni a. Draft Roll-a hming chuang ve lote chuan a hranin July ni 5, 2026 aṭanga August ni 4, 2026 chhungin ERO/AERO hnenah document dangte nen Roll-a luh dilna an theh luh a, a hrana hearing neih leh a ngai dawn a. Final Electoral Roll hi September ni 6, 2026-ah tihchhuah tur a ni.

He Special Intensive Revision chhung hian political party hrang hrangte'n an ai awh tur Booth Level Agent ruatin, anni hian Booth Level Officer-te nena thawk dunin ni khatah enumeration form 50 chin an theh luhsak thei dawn a. Draft Roll tihchhuah hnuah erawh chuan ni khatah enumeration form 10 an theh lut thei thung dawn a. Tun dinhmunah hian Lunglei District-ah Booth Level Agent hi political party hrang hrang ai awh 600 ruat an ni tawh.

NGO ai awhte pawhin Roll dik leh felfai nei turin a ṭul anga theih tawp chhuah an inhuam thu an sawi a. Lunglei District-ah hian Special Intensive Revision chungchanga zawh duh nei tan Toll Free Number 1950-ah emaw, ERO Office leh District Level-a Help Desk-ah emaw thu zawh fiah theih a nih thu tar lan a ni bawk.