2709/2026-2027

Dated Aizawl, the 16th October, 2026: Mizo Writers Association buatsaih – “Lehkhabu Pho Runpui Thawh 6-na” chu vawiin khan Vanapa Hall, Dawrpui-ah Information, Public Relations, Printing & Stationery (IPRP&S) Department Minister, Pu B.Lalchhanzova chuan a hawng a, lehkhabu chhiar ngaisang hnam kan nih chuan ram te kan nih ngai loh tur thu a sawi a ni.

Minister chuan Lehkhabu Pho runpui chu tangkai taka hman a nih theih beiseina nen hawngin Mizo mipuite’n lehkhabu hlutna kan hmuchhuah thar leh theihna pawimawh tak a nih thu a sawi a. Ziakmite chu hmasang ata mi huaisen leh hlu, vau leh tihthaih kara huaisen taka an chhungril ngaihtuahnate phawrh chhuak thin an nih thu sawiin zirna chawisangtu, kan ram meichher kengtute an nih thu a sawi a. Lehkhabu chhiar tam hnam chu zirna lamah hma an sawn ngei ngei thu sawiin zirna chu mi rethei leh hausa thliar lo, mi zawng zawng huang khata min dah theitu a ni a ti a. Chuvangin thalaite leh zirlaite chu ziakmi leh an lehkhabu ziahte ngaihlu thiam tura chahin chutianga kan ti a nih ngat chuan engtikah mah ram te kan nih ngai loh tur thu a sawi a ni.

Dr. Lalsangzuala, Organizing Chairman chuan hawnna hun hi kaihruaiin milmal hlawkna atan ni lo vin ziakmite chawimawina atan he hun hi buatsaih an nih zawk thu a sawi a, hawnna hun neih zawh hian Minister ho vin lehkhabu pho chhuahte en kual nghal a ni.

Lehkhabu Pho Runpui Thawh rukna hi October ni 16 atanga October ni 24 thleng neih tur niin zing dar 10 atanga tlai dar 6 chhungin a duh apiang tan hawn a ni ang a, zirtawpni bik chuan zan dar 9 thleng hawn a ni thung ang. He hun buatsaihna atan hian MWA-te hian Labour, Employment, Skill Development and Entrepreneurship (LESDE) Department atangin Rs. 80,000 an dawng a ni.

Lehkhabu hlui leh copy tam lo tih lo vah chuan lehkhabu pho chhuah tam zawkte hi a man pangngai aia tlawma zawrh niin lehkhabu hlui, lehkhabu dawra lei tur awm mang tawh lo thahnem tak a awm a. Tun dinhmunah hian ziakmi 128 (za sawmhnih leh pariat)-te lehkhabu ziah chu pho chhuah niin lehkhabu chi hrang hrang 1000 (sang khat) vel pho chhuah a ni.

Lehkhabu Pho Runpui hmasa ber hi hi kum 2019 khan neih niin a buatsaihtu, Mizo Writers Association-te hi kum 1977 khan din an ni a. Tun dinhmunah hian an President, Pu R.Lallianzuala hona hnuaiah MWA member-te hi 298 (za hnih sawmkua leh pariat) an awm mek a ni.