2708/2026-2027

Champhai dated the 16th October, 2026 : Vawiin khan Pu  Lalnghinglova Hmar, Minister, Sports & Youth Services Department chuan New Champhai-a Sports Complex sak mek chu a hmunah kalin hnathawh kal mek leh hmalak zel dan turte a enfiah.

Minister chuan Mizo infiammite tana ground tha ber ni hial a ngaih theih Multi Sports Complex Champhai-a din a ni tur leh he hna thawh chak a nih dan chu lawmawm a tih thu a sawi a. Hnathawh kal mek hi puitling tak leh a hun taka zawh fel a nih theih nan thawhhona tha a pawimawh thu sawiin, District Sports Committee-te chu neitu thinlung pua hna kal mek vil fo tur leh  hnathawktuten harsatna an tawhte lo enpui zui zel turin a chah a. Tluang taka hna chhunzawm a nih theih nan sawrkar lam hotute pawh a tul anga hna enpui thin turin a chah bawk a. Champhaiah mipui punkhawmna lian Hnahsin Kut a awm sa avangin, New Champhai field-ah he project kaltlangin sports event lian tham buatsaih a remchang dawn tih a sawi bawk a ni.

Mutli Sports Complex sak mek hi PMJVK sum cheng 10.474 crore hmanga kum hnih chhunga sak zawh tum a ni a. Kumin march aṭanga hna hi thawh ṭan niin kum 2028 March thla-a zawh fel tura ruahmnanna siam a ni a. Field phul lem phah tur zau zawng hi a dung  meter 110 leh a vang 76 meter niin, football field hi 105 x 70 meter a zau a ni thung dawn a. Field hi thirlen a hung vek tur niin, luhna kawngkapui pahnih hawn a ni dawn a.  Field chhungah hian pavilion pakhat, mi 180 bawr leng thei tur leh Pavilion sirah RCC gallery mipui 100 ve ve leng tura duan chu sak mek a ni a. Mipa leh hmeichhia hman tur zun in leh rualbanlo te hman tur bik siam tum a ni a. Underground RCC water tank litre nuai 1 siam tum a ni bawk. Football ground bakah a sir field awlah sports discipline hrang hrang dah tel theih tura duan a ni. 

Kum 2007 aṭang khan Multi Sports Complex hi nei theih tura hma lak ṭan ni tawhin tunah hian mimal ram hrang hrang lei khawm a sak a ni a. Lushai Construction-te kutah Multi Sports Complex sak hna hi dah a ni.

Vawiin a Multi Sports Complex ennaah hian Champhai DC Pu Mohammad Aaquib, SDO(Sadar) Dr. Peter Malsawmtluanga, Champhai District Sports Committee, Champhai District Football Committee hruaitute, Champhai District Football Association hruaitute, Champhai South VC Association hruaitute, District MJA hruaitute leh DIPRO aiawhte bakah hna thawktu Lushai Engineer-te an tel a ni