Department of Information & Communication Technology, Govt of Mizoram chuan vawiin khan nilengin I&PR Conference Hall-ah Internet Protocol Version 6 (IPv6) chungchanga inhrilhhriatna - Awareness Workshop an buatsaih. He workshop hi ICT Secretary, Pu C. Lalhmachhuana ITS, in a hawng a, Mizorama internet lo luh tan dante tarlangin Internet Protocol kan hman lai mek IPv4  chungchanga harsatna te a sawi a, IPv6 hman tan kan mamawh tawh thute a tarlang a ni. 

He Workshop-a zirtirna pe turin Department of Telecommunication, Govt. of India atangin Director pali – N. Ram, ITS; Manish K. Agarwal, ITS; Rajesh Gupta, ITS;leh SK Madhukar, ITS te an lo kal a, anni hian IPv6 chungchangte, sawrkarin IPv6 policy a neihte, IPv4 atanga IPv6 a insawn dan turte bakah harsatna awmthei te presentation hmangin an sawifiah a ni. Kalkhawm te nen sawihona hun tha tak an hmang bawk  a ni. 

Internet-a khawl in-connect zawng zawng hian IP address number a neih a ngai a, IPv4-ah hian 4.3 billion IP a awmthei a, chu chu khawvel pumpuiin kan intawma vangin indaihlohna nasa tak a awm mek a, IPv6-ah erawh hi chuan Khawvel zau zawng a Square meter khat bialah IP Address 1564 zel hman theih tur angin a awm thung a ni. India ramin IPv4-ah hian address number maktaduai 34 chauh kan nei a, India population nena ngaihtuahin indaih lohna a nasa hle a; chuvangin, Sawrkar laipui pawhin IPv6 hmang thei tur hian hma a la mek a ni.