425/2023-2024
12.05.2023 : Mizoram chhunga iron rod zawrh leh hralh tur atan BIS Standard size - 4mm, 5mm, 6mm, 8mm, 10mm, 12mm, 16mm, 20mm, 25mm, 28mm, 32mm, 36mm leh 40mm chauh phal a nih thu vawin khan hriattirna Pi Teresy Vanlalhruaii, Secretary, Food Civil Supplies and Consumer Affairs chuan hetiang hian a tichhuak.
Bureau of Indian Standard-in Iron rod siamtute zawm tura a dan siam ISI 1786 : 2008 (High Strength Deformed Steel Bars and Wires for Concrete Reinforcement -Specification) Section 6.1 -in a sawi angin, High Strength Deformed Steel of Indian Standard (iron rod) size atan 4mm. 5mm, 6mm, 8mm, 10mm, 12mm, 16mm, 20mm, 25mm, 28mm, 32mm, 36mm leh 40mm chauh pawm a ni a ; size dang chu a siamtu leh a hmangtute inremna chauha siam phal a ni. Standard iron bar-te hi a size mila a rihna tura bituk huam chhungah chauh siam tur a ni.
BIS Act 2016 in a sawi angin High Strength Deformed Steel /Iron rods siamchhuak tur hian phalna (Compulsory Certification) neih a ngai a. A standard phalsak ang chauhin BIS Licence neitu chuan a siam thei ang.
Tun hnaiah bazarah iron rod standard size tling phalo tam tak a awm tih hriat a ni. Heng iron rod size standard dik lo hi mipuite chuan hmangin an concrete structure chakna a hniam phah thin. Hei bakah hian heng iron rod-te hi a buk nilo, a mai (piece)a hralh a ni fo tih hriat a ni. Hetianga an hralh hian dealer-te chuan standard size in a huam chhunga rit thei ang bera hisapin dik lo takin an hralh thin.
Hetiang hi thil thleng mek a nih avangin mipuite tana a that beiseiin Governor, Mizoram chuan Mizoram chhunga iron rod zawrh leh hralh tur atan BIS Standard size - 4mm, 5mm, 6mm, 8mm, 10mm, 12mm, 16mm, 20mm, 25mm, 28mm, 32mm, 36mm leh 40mm chauh a phal a. A hralh nan pawh a buka buk chauh phalin Legal Metrology Wing, FCS&CA Department -in an endik Electronic Weighing Machine chauh hman tur a ni.
Hetih rual hian, tul bik thilah customer-in a chunga standard ang nilo size dang a lo mamawh a nih chuan, BIS in a certify ngei siamchhuaktu leh customer inkarah iron rod mamawh zat leh a hmanna tur ziakin an inremna an sign tur a ni.
A chunga hriattirna bawhchhia chu BIS Act 2016 leh CrPC Act 1973 hmanga hrem an ni ang. He hriattirna hi hman nghal tur a ni.
