2064/2026-2027

3rd Spetember, 2026: Irrigation & Water Resources changtu Minister Pu PC Vanlalruata leh Public Health Engineering changtu Minister Prof Lalnilawma te chu, September ni 1 leh ni 2 khan Sushma Swaraj Bhawan, New Delhi-ah Departmental Summit on Water programme-ah an tel. He Summit hi Ministry of Jal Shakti buatsaih niin, Prime Minister Pu Narendra Modi leh Union Minister for Jal Shakti, Pui CR Patil hova neih a ni. 

He Summit-ah hian State hrang hrang atangin Water Resources leh PHE changtu Minister te an tel a, ram chhunga tui chungchanga hmalakna hrang hrang thlirhona neih a ni.

Summit-ah Minister thusawi tura sawm tlem te zingah Pu PC Vanlalruata leh Prof Lalnilawma te tel vein, thu an sawi ve ve a. Pu PC Vanlalruata, Minister chuan Mizoram-in ruahtui kan dawng tha em em a, chutihrual chuan tlangram kan nih avangin kan ruahtui dawn tam tak hi a luang ral leh mai thin a; ruah tui khawl (rainwater harvesting) lamah theihtawpa hma an lak mek thu a sawi. Ruah tui kan khawl that theih chuan agriculture pawhin nasa takin hma a sawn thei ang a ti a, chutiang tur chuan tunah project hrang hrang DPR te buatsaih mek a ni a, Ministry of Jal Shakti lam pawhin lo ngai pawimawh thei hram se tiin a ngen nghal bawk. Mizoram Legislative Assembly chuan dan thar pahnih, The Mizoram Water Information and Governance Bill 2026 leh The Mizoram Flood Plain Zoning Bill 2026 te pawh tun hnai maiah a pass tawh thu a tarlang bawk.Minister hian Mizoram tana tui kaihhnawih project tam zawk chu Brahmaputra Board kaltlanga buaipui a ni thin a, duh aia hna a kal muan thin avangin, Brahmaputra Board tihchangtlun a tul tih a sawi bawk.

Minister Prof Lalnilawma chuan Mizoram-ah tui hna a tlem zel nia hriat a ni a, chu chu ngai pawimawhin PHE department chuan Mizoram-a NGO lian ber Young Mizo Association te nen tangkawpin MoU te ziah a ni a, hma an lak mek thu a sawi. Kan tuihna te siam tha leh turin Central Sawrkar leh State Sawrkar te tanrual a pawimawh a ni tiin, PHE Department hmalakna bakah hian Rural Development & Administration department atang pawhin VB G RAM G scheme leh PMKSY scheme te atangin tui hna enkawlna leh siamthatna hna hi an thawh mek thu a tarlang bawk.

Minister te hi Irrigation & Water Resources Department Secretary Er Lalrothanga leh Public Health Engineering Department Secretary Pi Zodingpuii IAS te'n an tawiawm a ni. a ni.