2063/2026-2027

Aizawl the 3rd September, 2026: Mizoram Tribal Film Festival 2026 chu Ministry of Tribal Affairs, Govt. of India tanpuina in Mizoram-ah neih a ni dawn. Mizoram Tribal Film Festival Working Committee chu Pu T.C. Lalkhuma, Joint Secretary, Art & Culture Department hovin 3.09.2026 khan thutkhawm a ni a. A hun atan hian 4th – 6th November 2026 ruat niin Vanapa Hall, Lianchhiari Run Mini Theatre leh TRI, Kelsih ah Film-te hi chhuah tum a ni.

He Film Festival ah hian Young Filmmakers ho tan Short Film Competition leh Reels making competition buatsaih a ni dawn a, State pawn atangin Tribal Filmmaker thenkhat sawm an ni dawn bawk a, Film Industry lama tuimi te tel turin Art & Culture Department chuan a sawm a ni.

He Film Festival hian Tribal Filmmakers te chawisang a an dinhmun sang zawka dah a nih theih nan hma a la dawn a. Mizo Film/Documentary, Short Film, leh Reels siam thin te a tam thei ang ber tel turin a sawm a. Inkaihhruaina hrang hrang te hi a kimchang zawkin tlangzarh a la ni ang.