4482/2024-2025
Aizawl, the 28th February 2025: Vawiin khan Lalbiakliana Filling Station, Aizawl-ah Tuialhthei renchem dan leh awmze nei a hman chungchanga inzirtirna – Stimulating Advanced Knowledge for Sustainable Health Management (SAKSHAM) 2024-25 Campaign kharna hun hman a ni a. He hun hi Speaker Pu Lalbiakzama chuan khuallian niin a hmanpui.
Speaker Pu Lalbiakzama chuan Tuialhthei hman dan awmze nei leh renchem chu Ministry of Petroleum and Natural Gas chuan sum leh pai nghawng thil a nih avang bakah mipuite kan lo hrisel zawkna tura hmalakna a nih avangin a ngai pawimawh a, SAKSHAM project hnuaiah mipui zirtirna hi ngawrh takin a kalpui tih a sawi.
Speaker chuan Tuialhthei chu awmna hmun bik nei, hmun tina awm lo leh sum tam tak senga laih chhuah, thlit fim a nih hnuah pawh man to takin a mamawh tuten kan lei thin a. Hei vang hian sum leh pai renchem kawngah a tul lova hman mai mai chi leh sum khawhralna atan kan hman loh thiam a ngai a ni a ti a.
Petrol kan hman hian sum tam tak kan seng mai a ni lo a, kan hriselna atan pawi thei thil Oil in thil tha lo a tihchhuah chi hrang hrang te leichung pawnlangah te leh boruakah kan hnuchhiah nghal a.Hei hian nasa takin ka hriselna atan te leh kan chhevel tuamtu boruak tan nghawng tha lo a nei thei bawk a. Chuvangin, petrol hman tlem tial tial, a tulah chauh hman inzirtir te bakah nizung chakna leh kawlphetha a tihnun theih, khawl leh lirthei te hman kan uar thara, kan inzirtir a ngai tawh hle a ni a ti.
Saksham 2024-25 Campaign kharna hun hi Pu Kuldip Sarmah, Manager (RS) Aizawl chuan a kaihruai a. Pu Priyaranjan Kumar, Manager CC) & LPG Sales, Aizawl hnen atangin report tawi ngaihthlak leh a ni a. Hemi hnu hian Pi Zodingliani, Proprietor M/s Zopuii Gas service chuan lawmthu sawiin huntawp a khar a ni.
