Indian Society on Tobacco & Health, Mizoram Chapter (ISTH-M) in vawiin khan Chief Ministr Pu Lal Thanhawla chu kum 76 a tlin champhaphak denchhenin Chief Minister tum nga ni theia thlan tlin anihnaah lawmpuiin a office chamberah chawimawina thilpek an hlan.

Chawimawina hun hi Pu Thanseia, Secretary, ISTH (M) in kaihruaiin ISTH(M) in kum 25 chhung harsa tak chunga an kal chhohnaah Pu Lal Thanhawla chu tha thlah lova thlawptu, a theina apianga puibawmtu anih thu a sawi a. Mizoram a kaihhruai chhunga nasa taka an than chhoh dan leh, zuk leh hmuamin kan taksa mai nilo kan ram thlenga a tihchhiat thukzia mipui hriata a sawi thinna avangte in, tunah chuan mite hriat hlawh leh ngaihpawimawh tak an nih tawh thu a tarlang a ni.

ISTH(M) President Pi Lal Riliani pawhin thu sawiin a thawhpui ten hetiang hun remchang an siam chu lawmawm a tih thu a sawi a, Chief Minister leh sorkarin an thil tumte an thlawp thinnaah lawmthu a sawi bawk a. An pawl thil tum chu thil tha a nih avangin thlawptu pawh a pun chhoh zel thu tarlangin, sorkar nen an kal chhohnaah sikreta tax sang zawk lak nise tia rawtna an thlen thin thute a sawi bawk a ni.

Chief Minister Pu Lal Thanhawla chuan hetiang chawimawina ISTH(M) a buatsaih chu lawmawm a tih rualin a phu lova chawimawi nia a inhriat thu a sawi bawk a ni. ISTH(M) hian chawimawina thilpek duhsakna thuziak, citation an hlan a. Pu Lal Thanhawla hian India rama chawimawina sang chi hrang hrang sawm chuang alo dawn tawhte an tarlang bawk a ni.

Vawiin hi Chief Minister Pu Lal Thanhawla pianchamphaphak, kum 76 a tlin ni a ni a. A pianchamphaphak hi Mizoram chhung mai nilo India ram hmun hrang hrang leh ram pawn atangtein duhsaktu mi thahnem takin lawmpuina an rawn thawn a. Chung zingah chuan AICC hotute, sipai hotu lal tak takte leh mi challang tak takte an tel a ni. Mizoram chhung atanga duhsakna hlantute zingah Governor Vakkom B.Purushothaman, Council of Ministers, Speaker, Parliamentary Secretaries, official leh midang thahnem tak an tel a ni. Chief Minister Pu Lal Thanhawla chuan duhsakna hlan tu zawng zawng hnenah lawmthu a sawi a ni.