St. Paul’s Higher Secondary School chuan vawiin khan kumina HSLC leh HSSLC Exam naah an sikul naupang Top Ten-a tlingte leh subject mala mark hmu sangte chawimawina “Paulians’ Proficieny Awards 2014” programme an buatsaih a. He programme Paulians’ Alumni Association te nen tangkawpa an buatsaihah hian School Education Minister Pu H. Rohluna chu khuallian niin a hmanpui a. Parliamentary Secretary Lt. Col. (Retd.) ZS Zuala leh Mizoram Board of School Education, Chairman Dr. Lalchungnunga te chu khualzahawm niin programme hi an hmanpui bawk a ni.

School Education Minister Pu H. Rohluna chuan HSLC leh HSSLC Exam-a zirlai titha te chu a lawmpui thu sawiin, an nu leh pate inpekna, an zirtirtute thawhrimna leh an mahni mimal taimakna te a ni, a ti a. Zirlai naupangte chuan zirna kawng an zawh tan dawn chauh a ni tiin tunah an hlawtlinna chu duh tawk mai loa, an zirna kawnga a tlahniam zawng ni loa, a sang zawnga kal zel turin a fuih a. Zirlai naupangte chu an zirna engtik lai pawhin ngaipawimawh a an hun zawng zawng an zirna atan hmang a, an chhungkua, ram leh hnam tan mi chhenfak awm ni turin a chah bawk a ni.

School Education Minister Pu H. Rohluna chuan St. Paul’s Higher Secondary School-in Mizoram tan a bikin zirna lamah an thawhhlawk dante chu sawi nep theih a ni lo a, ram hruaitute, sawrkara hna sang tak tak chelhtute leh mi hlawhling tam tak an chherchhuak tawh a ni, a ti a. Zirna lama he sikul rawngbawlna chu Mizoram mipui tan vanneihna a ni, tiin zirna lama an inpekna te chu kawng tam tak ah sikul dangte tan a entawntlak hle ni a, a ngaih thu a sawi bawk.

Pu H. Rohluna, Lt. Col. (Retd. ) Z. S. Zuala leh Dr. Lalchungnunga te hian zirlai titha hi Paulians’ Proficiency Award 2014 an hlan a ni.

Kumin HSLC Exam-a, 1-na, 2-na,(mi pahnih), 4-na(mi pahnih), 7-na, 9-na leh 10-na te an hauh a; HSSLC Science Stream-ah, 1-na atanga 7-na thleng an hauh bakah HSSLC Commerce Stream-a 6-na atanga 10-na thleng an hauh a. St. Paul’s zirlai naupang te hian English, Mathematics, Physics, Biology, Computer Science leh Business Mathematics subject-ah te mark hmu sang ber nihna an hauh bawk a ni.

HSLC Exam-ah khan zirlai naupang 308 neiin an zavaiin an pass vek a, chung zingah chuan 131 chu Distinction-ah, 137 in I Division-ah, 35 in II Division-ah leh 5 in III Division in an passed.

HSSLC Science Stream-ah naupang 140 an neih te chu pass vekin chung zinga 42 chuan Distinction-ah, 86 in I Division-ah leh 12 in II Division-ah an passed.

HSSLC Commerce Stream-ah naupang 42 an neih te chu pass vekin chung zinga 4 chu Distinction-ah, 14 in I Division-ah, 20 in II Division-ah leh 4 in III Division ah te an passed a ni.