Hrangturzo Assembly bial MLA thar atan thlan tlin leh Mizoram Legislative Assembly 7-na ah hmeichhe MLA awm chhun tur Pi Vanlalawmpuii Chawngthu chu vawiin khan Mizoram Legislative Assembly Speaker Pu Hiphei chuan Mizoram Legislative Assembly Conference Hall-ah rinawm thu tiam tir in MLA atan a la lut.
Pi Vanlalawmpuii Chawngthu MLA atana lakluhna programme ‘Swearing-in-Ceremony’ ah hian Chief Minister Pu Lal Thanhawla, Home Minister Pu R. Lalzirliana bakah Cabinet Minister-te, Deputy Speaker Minister of State-te, , Parliamentary Secretary-te leh MLA te an tel kim hle a ni.
Pi Vanlalawmpuii Chawngthu hi Pu C. Chawngkunga leh Pi Lalliankimi Sailo fanu niin kum 34 a upa a ni a, zirna lamah MA (Political Science) niin MPYCC a nihna hrang hrang te lo luah tawh in tunah hian MPYCC President ni lai mek a ni a, Dawrpui Vengthar ah chhungkua in an khawsa a ni.
