Industrial Training Institute (ITI), Aizawl in kum 50 a tlinna, Golden Jubilee chu vawiin khan Parliamentary Secretary Lt.Col (Rtd.) Z.S Zuala leh Mizoram Youth Commission Chairman Pu T.Sangkunga hovin an lawm.

Parliamentary Secretary chuan thiamna bik (skill) neia kut themthiam zirna hi sorkarin a ngaih pawimawh telh telh tih sawiin helama thalaite hmakhua ngaihtuaha nasa taka sorkarin tan a lak mek thu leh tan lak chhunzawm zel a tum thu a sawi a. Thalaiten ITI a training uar zel tur leh a zir mek te pawhin chhawr tlak thiamna pawchhuak ngei turin Lt.Col. ZS Zuala chuan a fuih a ni.

MYC Chairman Pu T.Sangkunga pawhin Skill Development Training chu thalaiten an ngaihven nasat tawhzia leh Mizo thalai engemawzat Skill Fest kaltlanga phai lama training tur tirh liam an nih thu a sawi a. Mizorama skill labour mamawhtuten ITI atanga zir chhuak ngei an chhawr duh bik tiin kut themthiamna hmang hian ram dang mite kuta Mizoram sum leh pai luangral tur kan veng thei a ni, a ti.

ITI, Aizawl hi kum 1964 khan din niin Mizoram buaiin a nan tak avangin a hmun tur tihfel theih a ni lova, Srikona (Assam)-ah a bet a. Mizo thalai training te pawh Srikona ITI hmunah hian an awm thin. Kum 1974 khan tuna a awmna hmunah hian a building te sak zawh a ni a, kum 1975 January thlaah Aizawlah an insawn tan a, April thlaah an insuan fel a ni. Aizawla a insawn tirh hian engineer trade 5 - electrician, wireman, motor mechanic (vehicle), fitter leh welder te hawn a ni. Tunah hian thiam zirna hrang hrang engineering trade 16 leh non-engineering trade 5 a awm mek a, thawktu 50 chuang awmin zirlai 400 vel an awm mek. ITI kum 50 tlin lawmna hi naktukah hman chhunzawm a ni ang.