Vawiin khan Mizoram Cooperative Fish Farming Marketing & Processing Federation Ltd. (ZOFISFED) chuan an pawl inkhawmpui General Assembly vawi 12-na Synod Conference Centre-ah an hmang a, he hun hi AH & Vety. Minister Pu C. Ngunlianchunga’n a hmanpui.

Pu C. Ngunlianchunga chuan ZOFISFED inkhawmpui palai zingah, thalai tam tak an kalkhawm chu lawmawm tiin Mizorama thalai lehkhathiam tam takin hna thawh tur an hmuh loh leh an hriat loh laia sangha khawi lamah thalai heti zat in ke an pen chu midang tan an entawntlak a, sangha khawi hi eizawnna tlak leh tling a ni tih an tih chiang hle thu a sawi. Sawrkar hna ringawta innghat lova, mahni kut ke ngei a dingchhuah tum te leh kut hnathawh kan in zirtir a tul a, hemi lamah hian kan thanharh a ngai tawh takzet a ni, a ti bawk.

Minister chuan Mizoram chu sa leh sangha tharchhuahna lamah a la intodelh loh thu sawiin ranvulh hi eizawnna tling leh dinchhuah tham a ni a, amaherawhchu hemi lama hlawhtling tur chuan taimak leh thawhrim a ngaiin kan thlawh hma te chu ngaihven leh buaipui a ngai bawk, a ni a ti. A hmun hma ten a zir chuan sangha khawi leh ranvulh tihkawp chuan kuthnathawktuten a hlawkna a tel tam zawk a rin thu sawiin AH & Vety Department nen tan hoa hmalak dan zawn tha a tih thu sawi lang bawk.

ZOFISFED-in a hnuai awm Society leh sangha khawitute tan ruahmanna hrang hrang a kalpui mek leh hmachhawp a nei chu lawmawm tiin an kal zelna turah duhsakna a hlan a ni. Inkhawmpui chawhma session hi ZOFISFED Chairman Pu F. Lalnienga chuan kaihruaiin Dr. O.P. Singh, Managing Director, ZOFISFED chuan an Sawrkar kum kal ta chhunga an hmalakna hrang hrang leh an pawl sum dinhmun te a tarlang a ni.

ZOFISFED hi October ni 29, 1998 khan Mizoram Cooperative Societies Act hnuai a din niin tunah hian Mizoram hmun hrang hranga sangha khawitu pawl primary society 22 lai a hnuaia an awm mek. Kum 2008 khan Sawrkar chuan Sangha chi siamna farm 8 Fisheries Department in an enkawl thin te chu ZOFISFED kutah a hlan a, chutah tang chuan – Thenzawl Fish Seed Farm, Saikhawthlir Fish Seed Farm leh Zawlnuam Fish Seed Farm atang te in sangha chi nuai 154.5 an tharchhuak tawh a, Farm dang 5 (panga) te chu cheibawl a la ngai a ni.

ZOFISFED hian sangha khawitute hamthatna turin Scheme hrang hrang te siamin hna an thawk a. Kum 2 kalta khan Buhchangphai, Darlak leh Zawlnuam ah te vur siamna Ice Plant an bun tawh a, Mizoram khaw dang 7ah pawh hetiang hi siam an ruahman mek a. Leilet a sangha khawi ‘Paddy-cum-Fish Culture’ hnuaia beneficiaries 871 an nei mek bawk.