Integrated Watershed Management Programme (IWMP) Champhai-I to Champhai-VI Project-te tan ‘Training & Discussion on Action Plan’ chu vawiin khan DRDA Conference Hall, Champhai ah neih a ni. He hun hi DRDA Project Director leh Project Manager, DWCDC, Champhai ni bawk Pu CC Lalchuangkima chuan hawngin, Champhai District chhunga IWMP hmalakna chu kawng tam takah hmasawnna tur la awm mahse tuna thlen chinah pawh hlawhtlinna hmuh tur, hmun dang atang pawha zirchiang tura an rawn pan thin a awm chu thawktute thahnemngaihna vang a ni, a ti.

Pu CC Lalchuangkima chuan plan siam chungchangah Project Implementing Officer (PIO) ten ngaihtuahna seng a, hlawkpui tak tak theih tur chauh hmalakna siam chu a pawimawh thu tarlangin, tupawh hi enfiah tawk thei kan ni tih inhriaiin, fimkhur leh taima taka thawk zel turin kal khawmte chu a sawm a ni.

Vawiin programme, Pu H. Zahmingliana, Assistant Engineer, DRDA Champhai kaihhruaiah hian IWMP State Level Nodal Agency (SLNA), lam atanga lo kal Pi Hmangaihzuali, JPO leh Pu Jedid Lalnundanga Keivom, Technical Expert (Enng.) ten zirtirna an pe a. Pi Hmangaihzuali chuan ruahmanna a felloh chuan dik thlap a pawisa hmang si, rah chhuah miahlo a hna thawh chu thil awm thei a nih thu a tarlang a. Plan siam dawnin uluk taka zirchiang a, chhawr tangkai tur thil a ni em tih chu ngaihtuah ngun a ngaih thu te, PIA tinte an thiamna kawng a inan loh avangin inrawn tlang thin tur te in kalkhawmte chu a hrilh a ni. Chawhnu lamah zawhna zawh leh sawihona hun hman nghal a ni.

SLNA lam hian kar hmasa lam khan Champhai District-a IWMP hmalakna leh hnathawhte kar hnih chhung chamchilhin an lo endik tawh a. Tunah hian Champhai District-ah IWMP Project 7 enkawl mek niin, khua 28 a tuam tawh a. Project thar tur ruahmanna a kal mek bawk.