Vawiin khan AH&Vety Minister Pu C.Ngunlianchunga chuan Mizoram Youth Commission tirha training-a kal tur hmeichhia 23 chu Mizoram Youth Commission Office kawt atangin a vailiam.
Pu Ngunlianchunga chuan sorkarin thalaite tana khawvel thar din a tumna kawngah MYC kaltlangin hma lak chhoh mek a ni a, thalaite’n state pawn hmun hrang hranga eizawnna an hmuh theihna tur kawng zawnsak hi sorkar hmalakna pawimawh tak a ni, a ti. Hlawhtling tur chuan rinawmna, taimakna leh tumruhna a pawimawh a. Khawi hmunah pawh mi hlawhtlingte chu hlawhchhamna an tawh chang pawha beidawng duhlo a bei talh talh, mi tuarchhel leh taimate an ni, a ti a. Nawmsak hmasak tum lovin chhel taka tuar in huama kal tur leh chutiang mite chu hlawhtlinna in a zui nge nge tih hre tura fuihin Minister chuan training tura kal thalaite chu nakin lawkah an hlawhtlinna chanchin ngaihnawm tak hriat leh a beisei thu te, an hlawhtlinna chu anmahni mimal leh chhungkua mai bakah nakina an thalaipui la kal ve leh zel turte tan kawng sialtu an ni dawn tih hre reng turin a chah a ni.
MYC Chairman Pu T.Sangkunga pawhin thu sawiin an training hun chhung zawnga taima taka an beih phawt chuan hna hmuh kawngah buaina an nei lo ang a. India ram mai ni lo khawvel hmun dang thlengin hna tha tak tak an hmu thei dawn a. Amaherawhchu, ti tha peihlo chu nakin lawkah beidawngin an lo haw dawn tih inhria a, a hlawhtlingte zinga tel ngei thei turin training tura chhuak thalaite a fuih a ni.
Thalai 23 te tirhchhuahna inkhawm hi Administrative Training Institute (ATI) Conference Hall-ah MYC Secretary Pu JT Vanlalngheta kaihhruaia neih a ni a. Tun tuma training a chhuak tur te hi Delhi khawpui atanga hnai tak Delhi NCR area Noida-a VLCC ah an kal dawn a. Hair and Beauty/Make Up thla ruk chhung an zir dawn a ni. Tun dinhmunah Mizoram sorkara Labour, Employment and Industrial Training (LE&IT) Department leh Mizoram Youth Commission hian State pawna thiamna chi hrang hrang zir tur Mizo thalai sang chuang an tir tawh a. An zingah hian hna tha tak tak hmu engemawzat an awm tawh a ni. Tarlan tawh thin angin an zir chhunga an mamawh chi hrang hrang hi sorkar laipui Skill Development Initiative Scheme (SDIS) kal tlanga tum sak vek an ni a. An zir chhuah hnuah International Approved Certificate an dawng bawk a ni.
