Vawiin khan ni hnih awh training ‘MIS Training on Integrated Watershed Management Programme (IWMP)’ chu Administrative Training Institute (ATI) ah tan a ni a, training hi Pu K Riachho, IAS, Secretary, Rural Development Department in a hawng a ni.

Training hawnna programme ah Pu K Riachho chuan MIS training chu a pawimawh thusawiin National Steering Committee in IWMP Project chungchanga, Project kaihhnawih website a dahluh a nih loh chuan, Committee in an pawmpui dawn tawh lo a ni a ti a. Hemi avang hian capacity building leh training te chu ngaih pawimawh a tul thu sawiin training tur te chu taima takin leh ngunthluk taka training turin a chah a ni.

Training pe tura lokal mithiam pahnih te chu – Pu V.M. Arora, Director (Watershed Development), Department of Land Resources, Ministry of Rural Development leh Pu Naveen Agarwal, Principal System Analyst National Informatics Centre (NIC) te an ni. Training ah hian IWMP hnathawh zawng zawng leh Detail Project Report (DPR) leh Action Plan zawng zawngte website a upload dan leh on-line a report pek dan te an zirtir dawn a ni. Training ah hian Project Implementing Agency (PIA) atana ruat Soil & Water Conservation Department aiawh te; Horticulture Department aiawh te, BDO te, District hrang hranga DRDA Project Director te, IWMP enkawltu officer te bakah All Mizoram Farmers Union (AMFU) leh Vanapa Society aiawh te an tel a ni.

IWMP hi 2009 khan Sorkar Laipui in a ruahman a, ram hectare 200409 a hmalakna tur cheng vaibelchhe 300.6135 chu a pawm tawh bawk a ni. IWMP in a tum ber chu ruah tui ring a, huan leh lo enkawltute chhawmdawl leh ram bua tur ven a ni a. Mi harsa zawk leh hmeichhiate intun nun nana hmalak te, ram leilung chhe zel tur ven leh ramngaw siam a leilung luangral tur ven a, ruah tui dawn te tangkai zawka hman dan inzirtir a huam tel bawk a ni.