Rural Development Minister Pu R.Lalzirliana leh Parliamentary Secretary Lt.Col (Rtd.) ZS Zuala hovin vawiin khan RD Conference Hall, Chanmari-ah Integrated Watershed Management Programme (IWMP) tuna Pradhan Mantri Krishi Sinchayee Yojana (PMKSY) lo ni ta hmalakna leh hnathawh hrang hrang thlirho a ni.
Pu R.Lalzirliana chuan Rural Development hna chu mipui nena inhne reng a nih avangin a chhe zawng leh a tha zawngin a langsar awl hle a, uluk leh fimkhur taka hnathawh a tul a ni, a ti. Loneitute an hnaah an tui em em rualin thiamna leh zirna sang zawk neiten an kaihhruai a tul thin a, amaherawhchu zirlaibu a an zir piahlamah a taka thawha lo danglam a awm tih erawh pawm turin a chah a. Record vawn that leh document neih that a pawimawh rualin kuthnathawktuten a tak taka an chhawr theih tura hna thawh a pawimawh zawk Minister chuan a ti. PMKSY hnuaia sum hman tur sawrkar laipui atanga lo kal chu thiam tak leh fing taka kan hman chuan thingtlang mi te tan thil ropui tak kan thawk thei dawn a ni, a ti bawk.
Lt.Col.ZS.Zuala pawhin thawktu kalkhawmte fuihin an mawhphurhna sanzia hria a theihtawp chhuah turin a chah a. State thenkhatah chuan khaw kheng avangin mi an thi a, an thlai leh buh hmun ten tui duhtawk an hmu loh avangin buh leh bal thar chhuah kawngah an tlahniam tih sawiin ruahtui malsawmna dawngtu Mizoram hian tangkai taka kan hman thiam a pawimawh a ni, Parliamentary Secretary chuan a ti.
Review meeting hi MzWDA Chief Executive Officer leh Rural Development Department Director ni bawk Pu V.Lalsangliana’n a kaihruai a. RD Minister Pu R.Lalzirliana hian IWMP Coffee Table Book ‘Changing Rural Lives Through PMKSY (Watershed Development)’ tih chu he hunah hian a tlangzarh nghal bawk.
PMKSY hi scheme kal mek pali - Accelerated Irrigation Benefit Programme (AIBP), River Development and Ganga Rejuvenation (MoW-R,RD & GR), Integrated Watershed Management Programme (IWMP) leh On Farm Water Management (OFWM) kaihkawp a ni a. He scheme in a tuam chin Project-ah ram bua leh leilung luang ral tur ven leh humhalh bakah tuihna humhalh hna a thawk ber a. Hemi atan hian land development, soil & moisture conversation leh water harvesting structure te kalpui a ni. Land development hnuaiah hian afforestation leh horticulture development te kalpui niin soil & moisture conversation hnuaiah hian terrace, contour, bunding, checkdam leh wet rice cultivation (wrc) te kalpui a ni. Water harvesting structure hnuaiah hian tuilakna leh dahkhawlna te, percolation tank leh farm pond te siam thin a ni bawk.
Project tuam chin khua a mite zingah mi chhumchhia leh hmeithai, eizawnna mumal neilo te tan eizawnna ruahman sakin Self Help Group (SHG) hmangin bul a tanpui thin a. IWMP hnuaia ruahmanna (plan) leh hmalakna siam reng rengte hi mipuite hriatpuina leh telvena vantlang inkhawm (gram sabha) hmanga siam leh duan thin a nih avangin a hnathawh a lang tlang a, mipui pawhin an chhawr hle.
Tun dinhmunah Mizorama District pariat chhungah IWMP hnuaia hmalaknaah project 89 kalpui mek a ni a, project cost chu cheng vaibelchhe 560.87 niin khua 303 a tuam mek. Heng zing atang hian project 16 chu kumin hian zawh tum a ni.
