IWMP leh MGNREGS atangin Khawzawl Lungvar vengah tuikhur tha tak pahnih siam a ni a. Khawzawl Lungvar veng Village Council chuan an vengin kum tam tak chhung tuikhur tha neih loh vanga harsatna an tawh thin hriatsaka sawrkarin tuikhur tha tak a siamsak chu lawmawm an tih thu thuchhuah siamin an sawi.

Khawzawl Lungvar VC te chuan an veng a tuikhur awmte chu a panna kawngte a chhiat bakah tuikhurte a tet avangin thal laia veng mipuiten tui chungchanga an harsatna tawh chu a nasa hle thin tih sawiin sum tam tak leh tha tam tak sengin veng thenawm leh hmun hla zawk a mi tui lei leh chawi te a ngai thin tih an sawi a. Khawzawl Lungvar veng mipuite chuan Khawzawl BDO Pu Lalrinzuala, MCS in IWMP leh MGNREGS atanga tuikhur zau tha leh hmunhma tha tak pahnih a ruahman sak avanga lawmawm an tih thu leh hei hian an harsatna nasa taka a sutkian sak thu an sawi bawk.