Vawiin khan Chief Minister Pu Lal Thanhawla chuan Sorkar enkawl leh Sorkar atanga tanpuina dawng sikul a kal mek naupang kum 6 leh kum 14 ten football lama hma an sawnna tur ruahmanna thar SSA-TATA Trusts Grassroots Football Development Programme chu Lammual ah a hawng.

Chief Minister Pu Lal Thanhawla chuan SSA-TATA Trusts Football Development Programme, SSA leh TATA Trusts te thawhhona atanga bultan choh tura duan leh kalpui mek in Mizoram Football leh Mizo naupangte tan hmasawnna a thlen a, malsawmna a nih ngei a beisei thusawiin he ni hi Mizoram tan ni chhinchhiahtlak tak a ni, a ti a. Football ah hian nasa takin hma kan sawn a, hmabak pawh kan la nghah a, vawiin ni a India Football Team Captain-a Mizo kan nei ta hi infiammite thawhrimna, inpekna, leh an tumruhna avanga thleng a ni tiin an mahni kaihruaitu sports administrator te leh MFA te hnathawh nasa takin a lang a. Football chu eizawnna mai nilovin footballer ten ram pumah hming chherna atan leh an mahni mimal sumpai dinhmun sawhngheh nana an hmang te hi thil ropui tak a ni, a ti bawk.

Pu Lal Thanhawla chuan kum riat kalta atang khan Sports Minister kaihhruaina hnuaia nasa takin sports ruhrel leh ruangam infrastructure lamah kan thang a, vawiinaah chuan ramchhung hmun dangte ngaihtuahin kan sports infrastructure te hi a zahpui awm tawh lo a ni, a ti a. Sports lamah Sorkar hmalakna Catch Them Young Policy chuan rah tha a chhuah thu leh a rah kan seng mek thusawiin kan thalaite hian zuk leh hmuam a insum a, ruihtheih thil lakah fihlim a, nun fimkhur leh uluk a, ei leh in a fimkhur a, chhung lam leh pawm lam nun vawn te hi a pawimawh a ni, a ti a. Infiammi te hi midang tan entawntlak ni tur chuan heng thil hi an ngaihpawimawh a tul a ni, a ti bawk.

Chief Minister chuan Football hi mipa tan chauh a nih loh thu sawiin hmeichhia te tan pawh a ni a, khawvel huapa mipa football inelna a lang tur chuan hun a la duh deuh mai thei a, mahse hmeichhe football lamah tan kan lak chuan khawvel huapa hmeichhe football ah hun reilote chhungin hmeichhiate an in vawrh chhoh thei ka ring a ni, a ti a. TATA Trusts ten football hmasawnna atan sum leh pai an thawh naah leh an hmalaknaah te lawmthu a sawi bawk a ni.

He hunah hian School Education Minister Pu H. Rohluna chuan TATA Trusts nen an thawhho chhoh dan leh hma an lak dante sawiin MFA hruaitute leh Sports & Youth Services Department ten an hmalakna an phurpui leh a hlawhtlin ngei theihna tura theihtawp an chhuahpui naah lawmthu a sawi a. He ruahmanna thar ah hian football hmasawnna piah lamah naupangten kawng hrang hranga hma an sawn ngei theih nan beiseina sang tak a neih thu a sawi bawk.

TATA Trusts aiawha he programme lo tel Pu Biswanath Sinha, Associate Director, TATA Trusts chuan TATA Trust kaltlanga sports lama an hmalakna leh Hmarchhak leh Mizoram tan bik football hmasawnna atana hma an lak tum dante a sawi a ni.

Vawiina programme hi Pu P. Lalchhuanga, IAS, Secretary, School Education Department chuan kaihruaiin Parliamentary Secretary Pu Joseph Lalhimpuia chuan lawmthu sawiin a kharna a hmang a. He hunah hian Sports Minister Pu Zodintluanga leh Sorkar mi pawimawh te, MFA hruaitute bakah he ruahmanna atan Ambassador ni tur Mizo footballer lar - S. Malsawmtluanga, Jeje Lalpekhlua leh Lalrindika Ralte te an tel bawk a ni.

SSA-TATA Grassroots Football Development Programme hi a bultanna chu June ni 14, 2016 khan neih niin Pilot Project atan District paruk - Aizawl, Lunglei, Champhai, Mamit, Serchhip leh Kolasib ah te Grassroots Football Center 60 din a ni a, heng center atana naupang te, trainer leh assistant trainer te chu lakfel an ni tawhin zirtirna pawh pek chhoh mek an ni a. Center pakhat atan Sorkar enkawl leh Sorkar tanpuina dawng sikul atangin naupang (kum 6 leh kum 14 inkar) 50 zel thlanchhuah niin Trainer pakhat leh Assistant Trainer pakhat zelin an enkawl dawn a ni. Center pakhat ah hian a tlem berah naupang hmeichhia 5 tal thlanchhuah tur a nih thu hi SSA leh TATA Trusts thawhhona thuthlung ah hian ziah a ni bawk.

He ruahmanna atana sum sen tur hi cheng vaibelchhe 2.73 niin cheng vaibelchhe 1.67 chu TATA Trusts peng pakhat North East Initiative Development Agency (NEIDA) kaltlangin a sumfaiin an tum dawn a, a bak cheng vaibelchhe 1.06 chu SSA in a sumfai thawh lovin Trainer leh Assistant Trainer te chu Health & Physical Instructor angin hlawh an pe dawn a ni.

Football hmasawnna atana Hmarchhak tan bik TATA Trusts hian cheng vaibelchhe 30 vel an thawh dan a, hemi sum hmang hian Centre of Excellence, Aizawl leh Hmarchhak khawpui danga an din dawn a, Centre of Excellence a naupang tha thlanchhuah chu Germany a Bundesliga a khel club pakhatah kum 6 tal training turin an tir dawn a ni.