Vawiin khan Aizawl DC, Pu Kannan Gopinathan, IAS chuan Superintendent of Police, FCS&CA Dept. hotute, DCSO (E & W) te, Manager LPG Sales, IOC te leh LPG distributors te ko khawmin tunhnaia LPG cylinder sem leh hralh chungchang leh LPG subsidy kaihhnawih, mipui tana harsatna thlen thei chungchanga hmalakna mumal leh mipui awlsam zawkna tur ngaihtuah ho a ni.

Tunlaia gas cylinder tihchingpen nasa lutuk chu Police lam pawhin hma nasa takin an lak thu tarlan a ni a. Distributor te pawh Gas bur buk tling lo te chu stock lo thlen ruala lo check thin turin DC chuan a ngen bawk.

LPG Control Order (2000) in a phut ang te chu zawm tlang turin distributor te a ngen a. Mipui awlsam zawk nana system tha kan neih theihna kawng khat chu IVRS (Interactive Voice Response System) hi a nih thu tarlan a ni a. Hei hi mahni Gas connection neihna Agency theuha Online booking tih theihna system a ni.

Online booking ti thei tur hian indane.co.in/ ah consumer chu a in register tur a ni a. In register hnuah chuan mahni awmhmunah internet leh sms hmangin online-a gas chu book theih a ni. Online-a gas book te chu distributor ten hun tiam chhungin an pe ngei tur a ni bawk. Distributor te pawh a theih ang angin home delivery ti tura ruahmanna lo siam tura ngen an ni.

Hei hian mipuite a sur a sa hnuaia Gas la tura intlar ngai thin a tihtawp bakah online registration-ah chuan midang chhut chawp ni lo, miin ama particular dik thlapa a chhut luh a ngaih avangin subsidy chungchanga pawisa kal sual hrang hrang pawh a sut kian theih beisei a ni a. Gas connection neihna Agency bik neih a tul bawk avangin he system hi mipui ten kan zawm tlan hunah chuan gas bur to tak taka hralhna black-market pawh a tihhniam theih beisei a ni.

Gas thuk leh parts te hi kum hnih danah vawi khat tal check tur a ni a. IOCL authorized mechanic te chauh tih tur a nih lain tuten emaw dan lova lo check leh parts thlak tul lo man to tak taka inleitir te an awm thin hi a pawi hie a. IOCL authorized mechanic chauh te hmanga he hna hi lo thawk turin leh kangmei hlauhawm laka mipui him nan an bial theuhah mandatory door-to-door inspection nei thin turin DC chuan distributor te a ngen a ni.