Vawiin chawhnu dar 1:30 khan DC's Conference Hall, Keifangtlangah Champhai Distric Level Screening Committee chu Champhai District chhunga sawrkar phalna lova inbenbelna hmun pathum - Saikhumphai, Tawitawkawn leh Chalrang Melhnih te chungchang ngaihtuahin an thukhawm a, Tawitawkawn leh Chalrang Melhnih te chu Sub-Village pek tura tehfung hrang hrangte an phakloh avangin hnawhchhuah (evict) tura rawtna thlen ni se a ti a. Saikhumphai erawh chu court-a thubuai kal mek a nih avangin a chungchang rel fel a la ni lo thung.

Meeting kaihruaitu Addl. D.C. Pu C. Lalzarliana chuan sawrkar phalna lova inbenbelna (unauthorized settlements) te hian hmasawnna a tih thuanawp bakah dan leh thupek kenkawh kawngah harsatna tam tak a thlen thin tih sawiin VC tinte chu an khaw ram chhung theuhah hetianga phalna lova inbenbel tumte chu a hma lama hmetmit zung zung turin a fuih a. Sawrkar department hrang hrangte pawh hmathar lakna tur reng rengah sawrkar department hrang hrangte nen inrawn tawn hmasak zel thaa a hriat thu a sawi bawk.

Vawiina District Level Screening Committee meeting-ah hian Kawlkulh North leh Chalrang khaw VC-te hnen atangin heng sawrkar phalna lova inbenbelna hmun (unauthorized settlements) pahnih, Tawitawkawn leh Chalrang Melhnih te dinhmun report ngaihthlak a niin, Tawitawkawnah hian in 14 a awm thu leh Chalrang Melhnihah hian in 4 a awm thu an tarlang.

Mizoram sawrkar chuan phalna lova inbenbelna hmunte chu Sub-Village atana tehfung an phak chuan Sub-Village dinhmun pek emaw Sub-Village tehfung phaklote chu hnawhchhuah (evict) turin thupek a lo chhuah tawh a. Sub-Village pek nana tehfungte chu - (1) Lo neih tur ram khawbul hnaiah zau tak a awm tur a ni; (2) Parent VC phalna a awm ngei tur a ni; (3) Sawrkarin assets a lo siam tawhte school leh thildangte eng ang nge awm tawh enfiah tur a ni; (4) In (household) 50 tal a ding ngei tur a ni, mahse 50 tlinglo pawh a tul dan azirin pek theih an ni ang; (5) Inbenbelna hmuna cheng mekte hian eizawnna leh an thil tih thin sawrkar phalloh thil duhawmlo dang an ti thin em tih ngun taka enfiah tur a ni; tih te a ni.