Vawiin khan Chief Minister Pu Lal Thanhawla kaihhruaina hnuaiah Mizoram State Olympic Association (MSOA) chuan Chief Minister’s Office Conference Hall-ah Annual General Body Meeting 2016 an nei a. General Body Meeting ah hian Sports & Youth Services Minister Pu Zodintluanga leh Parliamentary Secretary Pu Hmingdailova Khiangte bakah Sports Association hrang hranga hruaitu thahnem tak an tel kim hle a ni.

MSOA President Pu Lal Thanhawla chuan Mizoramin infiamna sports discipline hrang hranga India ah hriat a hlawh chho mek leh khawvel leh rampum huapa Mizo infiammi ten an hming an chher chho mek chu lawmawm a tih thu sawiin hei hi State Level Sports Association hrang hrangte inpekna leh infiammi thawhrimna avang a ni, a ti a. Kawng hrang hrangin infiamna lamah hmasawnna chu awm mahse hma la hma sawnna tur kan la nei teuh a ni, a ti a. Mizoramin infiamna chi hrang hrangah theihna leh talen a nei a ni tih chu ram pumin a hre chho mek a, Football ah phei chuan Football factory tih hial khawpin Mizoram hming hi a thang mek a ni, a ti a. Athletics leh Mipa hockey ah te tan lak tharna tur awm nia a hmuh thu sawiin rualkhai takin hmasawnna discipline hrangah awm se tih a duh thu a sawi a. Sports Association hrang hrang te chu tha thlah lova, tang tlanga Mizoramin infiamna khawvel ah hming a chher chhoh zel theih nan theihtawp chhuah chhunzawm zel turin Sports Association hrang hrang hruaitute chu a chah bawk a ni.

Meeting ah hian Hockey lama hma thar (revival) lakna turin ruahmanna siam a tul thu leh hemi atan hian Tlangnuam leh Luangmual khelmual te chu en mek a nih thu te; District Capital tinah District Sports Academy siam turin ngaihtuahna neih mek a nih thu te leh Aizawl District atan Muallungthu a ram en mek a nih thu te; Saitual leh Hnahthial ah phul lem artificial football turf phah tura hmalakna a awm thu te tarlan niin member kalkhawm ten zau leh chipchhiar takin Mizoram in sports discipline hrang hranga tun aia nasa leh zawka hlawhtlinna a hmuh theih nan a hma lakna tur la awm an hriat te chu an sawi lang a ni.

Meeting chuan MSOA Dan Bu siam that ngai laite an sawiho hnuin MSOA Dan Bu Constitution ennawn Committee din nghal rem an ti a. He Committee Chairman atan Mizoram State Sports Council Secretary leh MSAO Secretary General ni bawk Pu C. Laltlanthanga chu ruat niin Member atan – Pu K. Biakthianghlima, Joint Secretary, MSOA; Pu Lalnghinglova Hmar, Joint Secretary, MSOA; Dr. Lalrinawma Hnamte, Treasurer, MSOA leh Pu Lalthuamluaia Sailo, Member, MSOA te chu Member atan ruat an ni.

“Olympic-ah Mizo te engtin nge kan tel ve theih ang?” tih thupui hmangin Seminar neih a ni bawk a. Dr. Lalrinawma Hnamte,Treasurer, MSOA in power point presentation hmanga Seminar sawi hawnna a neih hnuiin Member kal atangin thupui sawi hona leh sawizauna hun neih nghal a ni a. An sawizau naah sports school changtlung tak din a tul thu te; coaching lama tan lak nasat a ngaih thu leh sports stadium awm mek te tun aia tha zawka enkawl leh thuamthat a ngaih thu te member te hian an sawi lang a. Secretary General in kumina MSOA hmalakna te sawiin report a tarlang a, Treasurer hnen atangin pawl sum dinhmun ngaihthlak a ni bawk.

Mizoram State Olympic Association hi kum 1986 ah Aizawl ah din a ni a, Indian Olympic Association hnuaiah affiliation tiin International Olympic Committee a thlun zawm bawk a ni a. Tun dinhmun ah MSOA ah hian State Level Sports Association 16-in affiliation an nei mek a, chungte chu : Athletics, Badminton, Basketball, Boxing, Football, Hockey, Judo, Table Tennis, Tennis, Taekwondo, Volleyball, Weightlifting, Wrestling, Rifle, Fencing leh Archery te an ni.

National Games a Mizoram contingent te kalna senso zawng zawng hi MSOA tum vek a ni a, International level tel tura thlanchhuah te Passport leh Visa te a tul angin a buaipui thin.

MSOA hian Olympic Vision 2016 hnuaiah infiammi thlan bik te sum leh pai a tanpuina alo pe nual tawh a. Tunah India Hockey team-a awm mek leh Rio Olympic 2016-a India tana khel thei tura beisei Lalruatfeli tan pawh MSOA in theihtawp a chhuah mek a ni.