Finance Minister Pu Lalsawta chuan, “Hmasawnna chu thawhrimna leh tih tak takna atangin a intan thin a. Mizoram hmasawnna tak tak thlentir tur chuan ram neitu thinglung puin mipuiten tih takzeta hna kan thawh a, inchawm zo tawk tawk (subsistence) atangin mahni dehchhuah hralhchhuak khawp (market economy) ah kan inleh a ngai a, hemi atan hian ‘tanpuina’ ni lovin ‘tang-puina (thawhrimna)’ a pawimawh zawk a ni,” a ti.

He thu hi nimina Baktawng khuaa Chhuanthar-te a tlawhnaah Pu Lalsawta chuan a sawi a. Mizoram hmasawnna tur atan sorkar chuan theihtawp a chhuah zelnaah mipuite nena tanghova beih tak tak a ngai a; kuthnathawktute leh rahbi tleu tawhte tundin leh nana NLUP kalpui mek tichaktu tur ‘New Economic Development Policy’ chu duan mek a ni a, hei hian Mizote tihausakna leihlawn pawimawh tak a ni dawn tih a sawi a. Baktawnga hun rei tak chhung mahni inrelbawlin Chhuanthar-te chuan eizawnna ngelnghet tak an neih chhovin intodelhna an hmu a, an thawhrimna leh remhriatna atang hian Mizo mipuiten zir tur tam tak an neih thu a sawi bawk a. Chhuanthar khawtlang hruaitute nen an inkawmnaah an inkaihhruai dan te, hnathawh dan an insem dan te, naupang leh thalaite taimakna leh intodelh duhna chungchang an inzirtir dante an sawiho a. Chhuanthar-te hian Carpentry, bel chhun, vawk leh bawng vulh, thingpui fe siam leh eizawnna peng hrang hrang an neihte Minister hovin an tlawh a, an veng chhunga anmahnia bul an tan Primary atanga Higher Secondary School thleng Minister hian a tlawh vek bawk a ni. Baktawng Chhuanthar-ah hian chhungkua 360 awm mekin an vaiin mi 2180 an ni a, hlawhtlinna an hmuhna chhan bul ber chu ‘ram neitu, cheitu, enkawltu leh venghimtu’ thinlung pua hnathawk leh hmasawn an tum zelna a ni tiin Minister an hrilh a ni.

Baktawng Chhuanthar-te a tlawhnaah hian Planning Jt. Secy. Pu Lalhmachhuana leh sorkar officials dangten Finance Minister Pu Lalsawta hi an tawiawm a ni.