Nimin khan Lungdai YMA Hall ah Serlui Bial chhunga HSLC leh HSSLC passed thar te chawimawina inkhawm neih a ni a. He hun hmanpuitu Khuallian Pu Hmingdailova Khiangte Parliamentary Secretary chuan inlawmna thu sawiin a bial chhunga zirlai thahnem tak ten zirna a hlawhtlinna an nei chu lawmawm a ti a. Zirlai te chu an hmalam hun lo kal leh zel turah nasa zawk a bei tur leh theihtawp chhuah zui zel turin a chah.

Pu Hmingdailova Khiangte chuan zirlaite fuihna thu sawiin an zirna kawnga tibuai thei thil tunlai hunah a tam tawh zia sawiin chung ang lakah chuan in veng fimkhur turin a chah bawk a. A bik takin tunlai natna hlauhawm tak HIV/AIDS lo hluar chho zel chuan Mizoram pawh run telin he natna tihbaihawm tak hian thalaite hmakhua thui tak a tih chhiat theih avangin mitinte fimkhur turin a chah a ni. Mizoram hi ram nuam tak a ni a, a chhunga chengte pawh in nuam kan tih ang bawkin kan chhehvel ram a mite pawh in kan ramah lo lutin kan thawh peih loh leh kan thawh theih loh te thawk turin an lo lut nasa em em a, heng ho tel lova in todelh thei tur a tan kan lak a ngai a ni, Parliamentary Secretary chuan a ti.A sawizelna ah zirlaite chu thil tum nghet (Ambition) fel tak nei turin a chah a, amah erawh chu kan thil tum ber kan ni pha lo a nih pawhin beidawng mai lovin thil dangah pawh hlawhtlinna a awm thei tih hriain inthlahdah lova bei turin zirlai te a chah. Kan zirlaite thiam tak leh bel taka kan zir chuan hlawhtlinna in min hmuak thin a ni, a ti bawk.