597/2022-2023
Aizawl, the 24th May 2022: Nizan thimhlimah khan Aijal Club-ah Irrigation & Water Resources Minister Pu C.Lalrinsanga chuan Japan International Cooperation Agency (JICA) hotute pualin mikhual pawimawh te puala cultural programme leh zanriah a buatsaih a. Cultural programme neih zawhah Agrilculture Minister leh Pu Akemine Kengo, Sr Representative of JICA India Office leh a kaihruai JICA team chuan an thawhhona hnuaia hnathawh mek te bakah project thar pawimawh tak taka thawhho theih dan tur an sawi ho nghal a. Tunah hian Mizoram sawrkar leh JICA hi Mizoram hmasawnna ruhrel siam kawngah thawkho mekin I&WRD chu Host Department a ni a, Agriculture, Horticulture leh Soil Department te chu line department niin Mizoram University chu Training, Evaluation, etc., partner a ni thung a ni.

I&WR Minister Pu C.Lalrinsanga chuana Mizoram sawrkar mikhual pawimawh te lawmna thu a sawi hmasa a. JICA leh Mizoram Sawrkar thawhhona tha tak hnuaiah tunah hian RD Block pathum chhungah hmalakna hmahruai te thzawh zawh a ni tawh a, a lawmawm takzet a ni a ti. JICA nena an thawhhona – Technical Cooperation Project(TCP) chu a Minister nihna anga a vil uluk thu sawiin hmasawnna tam tak a hmuh thu te, JICA in ruahmanna an siam chikimin line department hnuaia Mizoram mamawh chiang tak te an rawn hmuh hmaih miah lo chu a phurawm hle a ni a ti.

JICA Sustainable Farming System(JIFAS) hnuaiah Agriculture leh allied service sector-ah te awmze takin hmalak mek a ni a. Hei hi kuthnathawktuten an hlawkpui hle dawn niin a sawi a. TCP hnuaia JICA hmalakna hi a hmawrbawk hnai deuh tawh mahse Mizoram tan bika pawhsei dan kawng dap turin JICA hotute hi a ngen bawk a ni.

Pu Akemine Kengo, Sr Representative of JICA chuan Japan leh India chu thian tha tak an ni tih a sawi a. Vawiin lamah hian Tokyo-ah Prime Minister Narendra Modi leh Japan Prime Minister Fumio Kishida te chu Quad Summit 2022-ah an in hmu dawn a. He hunah hian thawhhona awm mek te an sawidun dawn bakah thawhhona neih belh dan tur te pawh an sawi belh a rin thu te a sawi a. India leh Japan hotuluber te inkawmnaah hian Northeast India an hmalakna intawm te chu sawiho tur zinga dah pawimawh a ni a. He inbiakna hian Hmarchhak biala hmalak mekah awm zia a neih a beisei thu pawh a sawi bawk. Pu Akemine Kengo chuan Mizoram sawrkar leh MZU nena an thawhhona chu an ngai pawimawh tih sawiin an hmalak mek te pawh a hmunah tlawh chhuah vek an tum thu te, an thil hmuhdan te state official te nen sawiho lehin hmachhawp te pawh uluk taka sawiho a ni ang a ti bawk a ni.

5 year TCP – ‘The project on Capacity Enhancement for Sustainable Agriculture and Irrigation Development in Mizoram’ hi Agust 2017 khan bul tan in July 2022 hi a tawp hun a ni a. TCP hnuaiah hian RD Block 4 – Bilkhawthlir Block, Kolasib District, Aibawk Block, Aizawl District,Serchhip Block, Serchhip District leh Champhai Block, Champhai District ah te hmalak a ni. Endline Survey of TCP chu November 2021 khan Department of Economics, MZU chuan an zo tawh a. Survey atanga a land an chuan heng hmalakna endik tak te hi a hlawhtling a ni. TCP hunchhunga kum 2 chuang kha Hripui lengin a tih khaihlak avangin kumin April thla khan TCP pawhsei rawtna leh ngenna chu JICA hnenah thlen a lo ni tawh bawk a ni.

JICA nen an inkawmnaah hian I&WR Minister Pu C.Lalrinsanga chu Chief Secretary Dr Renu Sharma, Pu J.Hmingthanmawia, Secretary, I&WR, Pu Lalrotluanga, Chief Engineer, I&WR, Pu James Lalsiamliana, Director, Agriculture, MZU lam mithiam te leh Line Department hrang hranga Senior Engineer leh Official ten an tawiawm a. Pu Akemine Kengo, Sr Representative of JICA hian Pu Subrato Talukdar, Principal Development Specialist, nula Kato Maria, Representative, JICA leh Nula Furuyama Kaori, Representative, JICA ten an tawiawm thung a ni.