598/2022-2023
Siaha; the 24th May,2022: Vawiin chawhma dar 11:00Am khan DC Conference Room-ah Siaha Town Beautification and Cleanliness Committee member te chuan Siaha town a lo thianghlim zawk theih nan leh a lo mawi zawk theih dan tur ngaihtuahin an thu khawm.

Siaha Town Beautification and Cleanliness Committee hi District bawrhsap Pu Lalsangliana hova din a ni a, Chairman-ah DC niin, Vice Chairman-ah Addl.DC leh Member Secretary -ah SDO(S) te ruat an ni a. Member 19 awmin, MADC leh GoM hnuaia concern Head of office te, NGOs leh Joint VC te bakah Florist Association atang te in member hi ruat an ni. Kumina UD&PA in Mizoram chhunga khawpui fai inelna result a chhuahah, Siaha town chu a bottom-ah kan awm a. He result hian Siaha khawpuia cheng te chu faina kawnga tan lakzual kan mamawh zia min hriattir se la, min benghar rawh se, meeting chuan a ti.

Kum 2019-ah khan Siaha town khan Fai inelna-ah Mizoram pumah 4 kan ni a, kum 2 kalta chhung hian kan lo bal zual sauh ta e, tina chu a ni hauh lo, NULM lamin data thenkhat thehluh hmaih palh an lo neih bakah district dang te hi faina kawngah Covid lockdown chhung hian tan an lo la nasa hle a ni, tih result atang hian a chiang hle a ni. Chuvangin Siaha khawpui chhunga cheng ten, tun aia nasa a faina kawnga ke kan pe a ngai tak zet a ni, meeting chuan a ti.

Vawiin meeting chuan Mizoram khawpui Fai inelna-a kan dinhmun te rilru-ah vawng reng chungin, Siaha khawpui a lo fai zawk theih nan leh a lo mawi zual zawk theih nan, hmalakna tur hrang hrang relin, Sub-committee te pawh din nghal a ni a. Faina kawnga kan hmalakna te chu enzuia, bawhzui turin thla khat-ah vawi khat tal Joint inspection neih thin turin meeting chuan a rel bawk a ni.