2379/2022-2023
Lunglei the 19th October,2022 - Vawiin khan Irrigation & Water Resources Deparment changtu Minister Pu C. Lalrinsanga'n Chanmari Lunglei ah Southern Data Centre cum Executive Engineer's Office a hawng a ni.

Hawnna inkhawm IWRD Secretary Pu J. Hmingthanmawia kaihhruaiah ah Lunglei HPC Vice Chairman Pu Lawmawma Tochhawng chu khualzahawm niin Lunglei District official-te, media mi te, party hruaitute leh I&WR Department thawktu mi thahnem tak an tel a ni.

Pu C. Lalrinsanga chuan Mizoram mipuite tana ro tling, eibar tharchhuah leh tui leh leilung humhalh kawnga ruhrel pawimawh tak Southern Data Centre hlawhtling taka ruahman a ni chu lawmawm tiin a ti puitling tura theihtawp chhuahtu I&WR Department te chungah lawmthu a sawi a. He Data Centre kaltlang hian Mizoram chhimlam District-a ruahtui tlak dan leh lui leh tuihna te dinhmun khawl hmanga uluk taka zirchian tur niin he hi Agriculture leh akaihhnawih department-te tan a tangkai dawn hle a, kuthnathawktute hmalaknaah pawh nghawng tha tak a nei dawn a ni, a ti a. I&WR Department hnuaia PM-KUSUM kaltlangin ni zung chakna hmanga tui pump chhuah theihna solar pump 1700 zet bun tum niin he hian kuthnathawktute tan hmasawnna nasa tak a thlen dawn a ni, a ti bawk. Hmasawnna tlo leh daihrei neihna tura kan lui leh tuihna te mumal taka humhalha, hman tangkai an nih theihnan I&WR Department chuan Mizoram Water Resources Regulation & Management Act a duan mekin zawh fel anih tep tawh thu kalkhawmte a hrilh bawk a ni.

He huna khualzahawm Lunglei HPC Vice Chairman Pu Lawmawma Tochhawng pawhin thu sawiin Southern Data Centre chu Lunglei leh chhimlam District mipuite tan malsawmna hlu tak a ni, a ti a. Eibar tharchhuah leh kuthnathawktute hmasawnna turin sawrkarin theihtawp a chhuah chhunzawm zel dawn a ni tiin Lunglei High Powered Committee pawhin hemi kawngah chak taka hmalak zel a tum thu a sawi a ni.

Er Lalrotluanga, Chief Engineer, I&WR Department in Technical Report a pe a. Southern Data Centre cum EE office hi sawrkar laipui National Hydrology Project (NHP) hnuaia World Bank Funded Project kaltlanga ruahman a ni a. A building ruahman na tura Planning & Design hi Mizoram Technocrats Company, Aizawl in siamin hemi atan hian Cheng nuai 8.08 sen a ni a. A building sak hna hi AIE Construction, Aizawl in thawkin Rs. 2,61,74,875.75 sen a ni. A building ah hian basement, ground floor leh 1st floor awmin a zavaia zau zawng plinth area chu 673.92 square metres a ni. He building hi chhawng hnih la sak belh theih tura a structure hi design a ni.

Southern Data Centre ah hian Mizoram chhimlam lui leh tuihna te dinhmun zirchianna atana hman tur khawl hrang hrang ruahman chhoh mek zel a ni.

Er Beizawzi T. Azyu, SE (W&D), I&WR Department chuan lawmthu sawina hun a hmang a ni.