2380/2022-2023
Aizawl, 19th October 2022: Chief Minister Pu Zoramthanga chuan vawiin khan Aizawl Sustainable Urban Transport Project (ASUTP) chungchang a nikhat awh Workshop buatsaih, Mizoram Rural Bank Auditorium, MINECO, a neih chu a khuallian niin a hawng. Dy. Chief Minister Pu Tawnluia chu khhualzahawm a ni a. He Workshop thupui chu 'Review of Existing Scenario & Finalising Mobility Indicators' tih a ni. He project hi UD&PA Department hnuaiah Asian Development Bank puihna in Project Management Unit in a enkawl a ni.

Chief Minister chuan khawpui thang zel avanga kawngpui tawt ta lutuk chu tihziaawm dan zawk zawnga kawng hrang hranga hma lak a nih dan sawiin, vawiin workshop buatsaih chuan mithiamte rilru chawk tho a, Aizawl tana tha tur ber ngaihtuahna a thlen ngei a beisei thu a sawi a. Khawpui hmasawnna chu a chhunga cheng mihringte tan harsatna ni lovin awlsamna a thlen zawk tur a nih avangin nakin zela tangkaina leh awlsamna min thlen thei tur hmasawnna ruhrel din a pawimawh a tih thu a sawi a. PAHOSS leh hmalakna dang hrang hrang siam a lo nih tawh dan te, kawngpui lunlai tawt lutuk tih thawl nana project lian tham hrang hrang buaipui mek leh khawpui chhehvela lirthei lian tan terminal siam te, sawrkar laipuia Ministry of Road Transport and Highways changtu Minister hnena kawng siamthat leh siam belh mamawhna te a thlen thu Chief Minister hian a sawi bawk a. Tun hma lama theih loh ang kan ngaih thin tam tak kha tunah a theih zia kan hmu zel tih sawiin, Workshop hlawkthlak deuh an hman a duhsak thu a sawi a ni.

Deputy Chief Minister Pu Tawnluia, UD&PA Department changtu chuan Aizawl khawpui thang zel chuan he Aizawl Sustainable Urban Transport Project siam a tul phah thu sawiin, Mizoram leilung in a zir avanga hmasawnna ruhrel liantham tak tak din a harsat thu te a sawi a. Chuti chung chuan theihna lai zawn zel a, ram danga hmalak tawhna te en chungin changtlung tak siam chu a theih thu a sawi a. Dy. Chief Minister chuan hmasawnna tur project thawh chu a changtlung ngei ngei tur a ni tiin, hlawk duh avanga quality lam ngaihthah chu tih miahloh tur a ni tiin, mipui tan vek a nih avanga thawh zawh hun tura intiam bawhpelh vak te chu tih loh tur a nih thu a sawi bawk.

Workshop hawnna programme-ah hian AMC Mayor Pu Lalrinenga Sailo pawhin thu sawiin, thingtlang atanga khawpuia pemlut tam avangn Aizawl khawpui tun hnaia nasa taka a than thu leh, chutiang ang dinhmun chu hmun dangah pawh hmuh a nih thin thu a sawi a. Heng avang hian khawpui chhunga inkalpawhna a pawimawh zual dan te, lirthei leh ke a kalte tana him leh awlsam zawka kalphung siamthat a tul thu te sawiin, Mayor chuan hmalakna siam chuan mi harsate thleng phak a nih tur thu a sawi a. Public transport te pawh, a hmangtu tam zawk chu mi harsate an ni thin a, chuan man to tak tuk a fuh ber loh thin thu te a sawi bawk.

Inaugural sessionah hi Pu Lalmalsawma Pachuau, Secretary, UD&PA Department & Project Director, PMU, ASUTP chu chairman chuan a kaihruai a. He hunah hian Pu Manish Rege, Team Leader, PPDMC in ASUTP ruangam sawina neiin, Pu Amit Kumar, Project Director, Mott MacDonald Pvt. Ltd., leh Dr. Renu Sharma, Chief Secretary ten thu an sawi bawk a ni.

He Workshop ah hian I&PR Minister Pu Lalruatkima, Aizawl West-I MLA Pu Zothantluanga, Aizawl South-III MLA Prof. F. Lalnunmawia te an tel bawk a. Sawrkar department hrang hrang aiawhte, MZU aiawh te leh NGO hrang hrang aiawh te bakah khawpui inkalpawhna/chetvelna lam heng Ropeway, Elevator leh Escalator lama thiamna bik neite an tel bawk a ni. Pu H. Lianzela, Director, UD&PA Department & Additional Project Director, PMU, ASUTP chuan lawmthu sawiin he Workshop Inaugural session hi a khar a ni.

Mis Mott MacDonald Pvt. Ltd. chu ASUTP hnuaiah Project Planning, Development and Management Consultants (PPDMC) atan rawih niin, anni hian ASUTP tan a inbuatsaihna a pawimawh tak Comprehensive Mobility Plan (CMP)chu hna hmasa ah neiin ngawrh takin an thawk mek a ni. He Worshop ah hian Conultant te hian Aizawl khawchhunga mipui chetvelna chung changa survey an neih atang a an thil hmuhchhuahte an entir bawk a ni. India ram hmun thenkhat leh khawvel khawpui hmun dang a inkawlpawh nana an hman heng - funiculars, ropeway leh cable car bakah ke a kal te tan a hman chi escalator leh elevator an hman don te entir niin hengte atang hian Aizawl khawpui tana tangkai leh hman theih turte zirchian a ni.

He hunah hian Azawl khawpui tana chetvelna tiawlsam thei tura rawtna hrang hrang te sawiho niin, he project in a kaihhnawih sawrkar department hrang hrang te bakah NGO hrang hrang te nen pawh lo sawiho tawh a ni. Hetiang Workshop hi November thla ah neih leh tur niin he Workshop neih turah hian inkalpawhna tho leh changtlung zawk neih don bakah he project in a tum tak tih hlawhtlin don turte sawiho leh zirho tur a ni ang.

Session hnihna hi Pu H. Lianzela, Director, UD&PA Department & Additional Project Director, PMU, ASUTP in a kaihruai a, Pi Nimisha Pal, Deputy Team Leader, PPDMC in Aizawl leh a chhehvel an zirchianna te, Survey an neih atang a an hmuhchhuah te, Focus Group Discussion neih atang an hmuhchhuahte bakah khawpui chhunga chetvelna leh harsatna awm thei te sawihna hun a hmang a, hemi hnu hian zawhna leh chhanna hun hman niin, he hun hi Pu Lalmalsawma Pachuau, Secretary, UD&PA Department & Project Director, PMU, ASUTP leh Pu H. Lianzela, Director, UD&PA Department & Additional Project Director, PMU, ASUTP ten an kaihruai a ni.

Session thumna hi Pu Lalmalsawma Pachuau, Secretary, UD&PA Department & Project Director, PMU, ASUTP in Chairman niin a kaihruai a, he session ah hian Pu Manish Rege, Team Leader, PPDMC chuan Ministry of Housing and Urban Affairs in Service Level Benchmark a siam chhan leh hman a nih chhan te sawiin, Pu Digbijoy Bhowmik, Institutional Expert, PPDMC in Visioning Exercise: making Mobility Indicators work for Aizawl tih thupui hmangin hun a hmang a, Panel Discussion neih niin hemi zawh hian Non Motorised Transport Expert leh Ropeway Expert ten Case Study presentation neiin hun an hmang bawk a ni. PPDMC hmathlir leh lawmthu sawina hun Pu Manish Rege, Team Leader, PPDMC in hmang in session thumna hi khar a ni a, Workshop tih tawp zui a ni.