1079/2024-2025

Aizawl dated 5th July, 2024: Vawiin khan Irrigation & Water Resources Department buatsaihin ‘State Hydro-Met Data Centre & Water Quality Laboratory’ hawnna hun neih a ni a. Pu PC Vanlalruata, Minister, I&WRD chu khuallian niin Er. Lalrothanga, Chief Engineer chuan hun a kaihruai a ni. 

Minister Pu PC Vanlalruata chuan dinhmun zirchian hmasakna tel lo chuan hmalak dan tur ruahmanna siam a harsat thin thu sawiin Irrigation & Water Resources Department kaltlangin National Hydrology Project hnuaiah Mizoram a tui kan neih dan dinhmun chiang tak a lakkhawmna, 'Real Time Data Acquisition Centre' leh ‘Water Quality Laboratory’ hawng thei a buatsaih a ni chu lawmawm a tih thu a sawi a. Tui chungchanga hriatna lakkhawmte hi I&WR Department bak ah Agriculture, Horticulture, Public Health Engineering,  Mizoram State Pollution Control Board leh department hrang hrang pawhin hmasawnna hna thawh nan tangkai taka an hman a beisei thu a sawi. I&WRD Minister chuan ram tihmasawn tur chuan Sawrkar department hrang hrang hnuaia thawktuten thiamna thar hmanga kuthnathawktute nen tangrual a thawhho an thiam a tul thu a sawi a. Hmasawnna tluantling nei tur chuan a chhung a cheng mipuite thahnemngaihna leh inpekna a pawimawh hmasak thu a sawi bawk a ni.

Er. Lalrothanga, Chief Engineer chuan kalkhawmte lawmna thu sawiin Mizoram in kan luia tui luan luh leh chhuah dan dinhmun leh tui awm zat chhinchhiahna mumal tak kan la neih loh avangin ruahmanna duan kawngah harsatna a awm thin thu a sawi a. ‘State Hydro-Met Centre & Water Quality Laboratory’ chu kan ram a tui kan neih dan dinhmun dik tak hriat nan leh chung data-te chu tangkai taka hman a nih theih nana hmanraw pawimawh tak a nih tur thu a sawi. Er. K.Hamlet, Sr. Executive Engineer chuan Technical Report pein Er. Beizawzi T. Azyu, Superintending Engineer (W&D) chuan lawmthu sawina hun a hmang bawk a ni. ‘State Hydro-Met Centre & Water Quality Laboratory’ hawnna hun ah hian Agriculture, Horticulture, AH & Vety, Mizoram State Pollution Control Board, MZU-a thawktute an tel a ni.

National Hydrology Project (NHP), Central Sector Scheme hi 2016 atang khan  India  ram pum ah kalpui a ni a, Mizoram State atan a Implementing Agency chu Irrigation & Water Resources Department (I&WRD) hi a ni.

NHP hian thil tum lian tak a neih chu India ram pumpui ah water resources Data  rintlak lakkhawm a, awmze nei tak a  dah khawm leh a hmang tangkai tur hnen a pek chhuah a ni.

State Hydro Meteorological Data Centre-ah hian technology thar ber ber hmangin tun a thleng mek (real time) data, lui tui luang zat, ruah sur zat, tui hu kal zat, boruak hnawn dan, thli thawt dan, khaw lum leh vawh dan, boruak nekna zat, ni sat dan leh lei hnuai a tui awm dan te kan hre thei a, chumai ni lovin tunhma a thleng tawh (historical) data pawh  kan hmu thei a ni. Kan tui neih zat dik tak leh a chet vel dan  kan hriat chian chuan, a tul hunah  domestic atan te, agriculture atan te leh industry atan a kan  tui insem dan tur ruahmanna mumal tak, data rintlak a innghat (data based water allocation), neih theih a ni ang. 

1.    Automatic Weather Station (AWS):

Automatic Weather Station (AWS) Mizoram chung hmun hrang hrang ah Automatic Weather Station (AWS), hmun 12-ah bun a ni. He AWS atang hian Rainfall intensity (ruahtui tlak dan) te, Temperature (khaw lum leh vawh dan) te, Humidity (boruak hnawn dan) te, Wind Speed & direction (Thli thawt dan) te, Solar radiation (Ni sat zawng leh lan rei zawng) te, leh boruak nek natna zat chhinchhiah niin, heng data lakkhawm zawng zawng hi automatic-in State Data Centre-ah  chhunkhawm a ni.

2.    Automatic Rain Gauge Station (ARG) : Ruahtui tla tehna tur hian a bikin Automatic Rain gauges Station 27 din a ni a, Heta data lakkhawm hi Data Centre-ah automatic-in  thawn nghal zel a ni bawk. Tin, hemi bak ah hian Manual Rain Gauge hmun li-ah dah a ni bawk a ni.

3.    Automatic Water Level Recorder (AWLR) : Mizoram a kan lui tui luang zat hriat theihna turin lui 17 atangin hmun 22-ah he khawl hi bun a ni a, lei(Bridge)-ah sensor dahin, chu chuan  lui tui tui chim chin a lo chhinchhiah ang a, ‘Raiting Curve’ hmangin luang zat a hriat theih dawn a ni. Tui chim chin chu Data Logger-ah inchhung lutin, Data Centre-ah englai pawhin  thawn chhuah reng a ni dawn a ni.

4.   Groundwater Exploration & Monitoring : Mizoram chhunga kan lei hnuai tui (groundwater) dinhmun kan hriat theihna turin hmun 20-ah Piezometer bun a ni a,  hetah hian Digital Water Level Recorder (Telemetry) hmangin lei hnuai tui dinhmun a hriat theih dawn a ni.

STATE HYDRO-MET DATA CENTRE :

State Hydrometeorological  Data Centre-ah hian  a chunga khawl hrang hrang hmanga kan data neih te, Station hrang hrang atangin chhunkhawm a ni a. State Data Centre atang hian India  Water Resources Information System-ah thawn chhawn ve leh niin, heng data te hi Scholars, Researcher  leh mipui ten an mamawhna kawng zel ah tangkai takin an hmang thei dawn a ni.