1080/2024-2025

Dated Serchhip, the 5^th July, 2024: Vawiin khan Serchhip DC Pu Paul L.Khuma hovin Serchhip DC meeting hall-ah District Level Steering Committee on Stop Diarrhoea Campaign meeting pawimawh tak neih a ni a. Naupang kum 5 hnuailam zingah kawthalo natna avanga thihna umbo a nih theih nan Serchhip District chhunga hmalakna tur hrang hrang te an sawiho a ni. 

Serchhip DC Pu Paul L.Khuma chuan Serchhip District chhungah kum 2023-2024 chhungin naupang kum 5 hnuailam kawthalo vanga thi an awm lo chu lawmawm a tih thusawiin hun lo la kal zel turah pawh kawthalo natna avanga naupang thi an awm lohna turin tan lak zel a tul thu a sawi a. Inven theih leh enkawl dam theih natna avanga nunna chan an awm loh na tura tan lak pawimawhzia sawiin kawthalo laka naupang an him theihna tura hmalakna te puanzar tam a tul thu leh, a inenkawl dan leh inven dan inzirtir tam a tulzia a sawi a. Member kalkhawmte chu an tihtur an kova tla te tha taka hlenchhuak a, ruahmanna fel fai tak siam turin a chah a ni.

STOP Diarrhoea Campaign hi Sawrkar Laipui ruahmanna niin thla hnih chhung - July leh August thla chhunga neih tur a ni a. Serchhip District ah pawh a hawnna programme hi July ni 1 khan neih a ni tawh a. Kum dangah he campaign hian kar hnih chauh a awh thin laiin kumin atang hian thla hnih a awh tawh dawn a, Health & Family Welfare Department kaihhruaiin Department hrang hrang PHE, UD&PA, Social Welfare, DRDO, I&PR, Education Department leh Rural Development Department te nen tanghoin kawthalo umbo beihpui thlak a ni dawn a ni.

Stop Diarrhoea Campaign-in a tum ber chu India ram pumah naupang kum 5 hnuailam kawthalo vanga thi an awm tawh lohna tura beihpuithlak a ni a. Mizoramah hian kum 2023-2024 chhung khan naupang kum 5 hnuailam kawthalo vanga thi pakhat (1) a awm thu meeting-ah tarlan a ni a. Serchhip District ah erawh chuan naupang kum 5 hnuailam kawthalo vanga thi an awm lo a ni. He campaign hun chhung hian naupang kum 5 hnuai lam te chu ORS leh Zinc pek vek an ni dawn a, Serchhip District ah hian naupang 5297 hnenah ASHA ten in tin tlawhin heng damdawi te hi an pe dawn a ni.

Vawiin meeting-ah hian line department tin te chu an hmalak dan tur ruahmanna ‘action plan’ duang tura hriattir an ni a. Heng an ruahmanna siam te hi Stop Diarrhoea Campaign neih hun chhung July leh August ah te ngawrh takin an kalpui dawn a ni.