749/2023-2024

South Vanlaiphai the 9th June 2023 – Hon’ble Minister Irrigation & Water Resources Department Pu C. Lalrinsanga chuan vawiin khan PMKSY-Har Khet Ko Pani 2019-20 kaltlanga Rs. 2,54,36,000/- (Cheng Vaibelchhe hnih, nuai sawmnga pali leh sing thum sang ruk) senga ruahman Zaupui Ground Water Irrigation Project chu South Vanlaiphai ah a hawng.

Hawnna inkhawm IWRD Secretary Pu H. Lalthlangliana kaihhruaiah Minister Pu C. Lalrinsanga chuan Zaupui Ground Water Irrigation Project chu kuthnathawktute hmalakna kawng hrang hranga hmasawnna nasa tak thlentu anih ngei a beisei thu sawiin, he project ti hlawhtling tura theihtawp chhuahtu I&WRD thawktute chungah lawmthu a sawi a. Zaupui Project tiam hian I&WRD chuan PMKSY Scheme kaltlangin Mizoram hmun hrang hrangah Ground Water Irrigation Project 13 lai a ruahman thu Minister chuan a sawi a ni.

Kuthnathawktute hmasawn zelna tura Mizoram Sawrkar hmalakna kal mekte chungchang sawiin Minister chuan Mizoram tan Collective Farming Policy a duang mek thu a sawi a. He policy hnuaiah farmer intelkhawmten Farmer Producer Organization (FPO) an din anga, sawrkarin a tul angin an mamawh khawl te a ruahman sak anga, FPO te hian kum khatah thlai chi hrang pathum (3) tal ching in, kuthnathawktute hmalakna mumal zawkin a kalpui theih dawn a ni, a ti a. Kuthnathawktute tharchhuahte hralhna kawnga hma la tu tur Agriculture Produce Marketing Committee pawh Mizoram din thuai tum niin, Thingdawl khua ah tissue culture hmanga alu chi siam chhuahna hmun pawh ruahman mek anih thu a sawi a. RKVY scheme kaltlangin Mizoram hmun hrang hrang Solar Cold Storage 12 ruahman tura hmalak mek anih thu a sawi bawk.

Er. L. Malsawma Hauhnar, Sr EE (P), IWRD in Zaupui Ground Water Irrigation Project chungchang Technical Report a pe a. He project hi PMKSY-Har Khet Ko Pani 2019-20 kaltlanga ruahman a ni a. He project in area a huam chin (command area) hi hectare 91 a zau a ni a. Beneficiary-te hi kuthnathawktu chhungkaw 78 niin, tube well 31 leh 5HP solar panel 31 te bun an ni a. He ground water irrigation-in tui a pump chhuah chak zawng hi second khat zelah litre khat a ni a, RCC a siam tui dah khawlna litre 39,250 len na reservoir pasarih (7), buatsaih a ni bawk.

Er. K. Lalsangzuala, SDO, IWRD Lunglei chuan he project chungchang sawifiahna powerpoint presentation hmangin a nei a. Pu S. Lalthanzuala, Zaupui Association Vice President chuan kuthnathawktute aiawhin thusawina hun hmangin Er Laldinpuii, EE Lunglei Division chuna lawmthu sawina hun a hmang a ni.

Hawnna inkhawm hi Community Hall-II, South Vanlaiphai ah neih niin  IWRD CE Er Lalrotluanga hovin IWRD staff te, Agriculture, Horticulture, I&PR official-te bakah Hnahthial MJA hruaitute, party hruaitute leh kuthnathawk mi thahnem tal an kalkhawm a. Kuthnathawktute hnenah hian pipe semchhuah a ni bawk a ni.