750/2023-2024

Lunglei the 9th June, 2023: Vawiin khan Green Mizoram Day 2023 pualin “Thingphun ila, enkawl zui ang u” tih thupui hmangin District Level Committee on Green Mizoram Day (DLCGMD) buatsaihin Lunglei-a sawrkar department hrang hrang, Village Council leh NGO ten Lunglei to Mausen kawngdungah a huhova thingphun hnatlang an nei. He Ni puala inkhawm hi Pukpui Centenary Lunglei ah neih niin Dr.K. Pachhunga, MLA & Vice-Chairman Mizoram Bamboo Development Board chu khuallian a ni.

Green Mizoram Day 2023 hawnna inkhawm Lunglei Addl.DC & Chairman District Level Committee on Green Mizoram Pu Donny Lalruatsanga kaihhruaiah Dr.K. Pachhunga chuan Department hrang hrang, YMA, MUP, LMC Councillor, Save Tlawng Lunglei, MJA te phur taka an rawn kal avangin lawmthu a sawi a. Kum 1998 ah Government College-ah Green Movement mi thahnemngaite nen din a ni a, he pawl hian khaw hrang hrangah thing leh mau, lui leh nungcha te humhalh kawngah awareness an lo nei tawh thin thu a sawi a. Nitin kan mamawh thing leh mau te hi kan humhalh a ram ti kang lo tura hmalak a ngaih thu a sawi bawk. Sik leh sa alo danglam avangin tuiah kan harsa tawh a, tuihna a tam nan thingphun a ngai a, tuihna kan tihpun loha, a awm ang ang ren loa hman huau huau hi hnam mawl zia a ni, a ti a. Nu leh pa hming ten, kan fate piancham denchhen te hian thingphun intih hmuh thei ila a that a rin thu a sawi. Green Mizoram hi kan tu leh fate leh Mizoram tan a ni tih hre reng a, kan thingphun te hi enkawl theuh turin a chah bawk a ni.

Green Mizoram Day 2023 hawnna inkhawmah hian Lunglei DFO & Member Secretary District Level Committee on Green Mizoram Pu PC Lalchhandama chuan report pe in, nikum Green Mizoram Day khan thingtiak 476 phun niin agency hrang hrang hnenah thingtiak 6856 sem niin kum 1999 atanga 2022 chhungin Green Mizoram Day-ah thingtiak 13126 phun niin thingtiak agency hrang hrang hnenah 567443 sem a ni. Pu B.Lalchungnunga MUP General Headquarters, Lunglei chuan lawmthu sawina hun a hmang bawk.

Vawiin Green Mizoram Day 2023 puala inkhawmah hian Lunglei District huamchhunga kangmei laka invenna (Fire Prevention) lama khaw ti thate hnenah khuallian chuan lawmman a hlan nghal a. Chungte chu :

1st Prize - Tawipui S - Rs.50,000/- + Certificate

2nd Prize - Hmuntlang - Rs.30,000/- + Certificate

3rd Prize - Buarpui -Rs.20,000/- + Certificate

Consolation Prize:

Rangte - Rs.3000/-

Lungdai ‘S’ - Rs.3000/-

Sairep - Rs.3000/-

‘Green Mizoram Day 2023’ hawnna inkhawm neih zawh hnu hian Lunglei to Mausen kawngdungah Mass Tree Planting neih niin a vaiin thing tiak 395 phun a ni.