751/2023-2024

Aizawl, 9th June 2023: Vawiin khan Thingsulthliah Higher Secondary School chuan HSSLC Exam 2023-a hlawhtlinna an chan lawmna hun leh Freshers’ Day an hmang a. Power & Electricity Minister, bialtu MLA ni bawk Pu R. Lalzirliana chuan he hun hi khuallian niin a hmanpui.

Thingsulthliah HSS-a inkhawm tawi neihah Pu R. Lalzirliana chuan zirlai hlawhtlingte chawimawina hun tha tak an hmang thei chu lawmawm a tih thu a sawi a. Thingsulthliah Higher Secondary School in result tha tak an nei thin tih sawiin, zirtirtu ten hmangaihna nena zirlaite an enkawl rahchhuah a ni, a ti. Zirlaite chu nakina ram hruaitu tur an ni tih in hre reng a, school uniform an hak loh hnu ah pawh mahni invawng tlat tur leh thiamna zau zawk neih tum zel turin a chah a. Mizo tlawmngaihna lanchhuah tir a, vawng nungtu ni zel tur leh midangte tana malsawmna nih tum zel turin a fuih bawk.

P&E Minister chuan khawvel inthlak zelah tum nei rana lehkha zir a pawimawh tih zirlai ten an hriat a tul thu a sawi a . An kawng zawh zel turah rinawmna, chhelna, taimakna bakah nu leh pa thuawih a pawimawh zel dawn a ni, a ti. Mizoramin All India leh Central Service a inziak tling a neih lohna a rei tawh thu sawiin Minister chuan zirlaite chu ramchhunga lungawi mai lova, central service lama an ngaihtuahna te seng turin a ngen a. Thingsulthliah HSS result lawmpui nan Laptop leh Projector a hlan tur thu a tarlang bawk.

Vawiin programme hi Pi K. Lalchhuanmawii, Lecturer, Thingsulthliah HSS chuan a kaihruai a, School Managing Board leh zirlaite hnen atangin thusawi leh zai ngaihthlak a ni bawk.

Thingsulthliah Higher Secondary School hi kum 2004 khan din a ni a. Tun dinhmunah hian zirlai 150 an awm mek a.  HSSLC exam hnuhnung berah khan zirlai 80 in exam an hmachhawn a, zirlai 78 in hlawhtlinna changin pass percentage hi za zela 97.5 a ni.