Vawiin hian Parliamentary Secretary, Bialtu  MLA  ni bawk Pu Lal Thanzara chuan J/C Security Guard 15th Batch Passing out Parade chu Electric Veng YMA Hall-ah hmanpui in, training chhuak te certificate a hlan a ni.

Pu Lal Thanzara chuan khawvel changkang zelin a mamawh venhimna, hmathlir thui tak leh tha tak nei a JC Security Guard & Labour Supply Agency din a nih chu lawmawm a tih thu sawiin, a dintu chhungkua te chu fakawm a tih thu a sawi. Mizo thalai ten hna hmuhna tha an neih theih phah mai bakah midang tana malsawmna an ni theih phah a ni, a ti. Training chhuak te chu an hna in a ken tel tlat rinawmna leh huaisenna vawng nung reng tur leh zuk leh hmuam leh ruihtheih thil laka fihlim tlatturina chah a ni.

Training chhuak te hi an vaiin mi 61 niin, hmeichhia 10 an tel a ni. Pu H. Zoliana’n rinawmna thutiam a neih tir a, Rev. K.C.Vanlalduha’n tawngtaiin a hlan a. Training chhuakte hian an thiam thil leh zir te an en tir a ni.

JC Security Guard & Labour Supply Agency hi Pu JC Chana(L) hriatrengna atana a nupui Pi Laldingliani leh a fate din a ni a. Home Department phalna a din a ni a. In leh lo, sumdawnna, Damdawi in, Zirna in, Hotel, Industry, Bank, ATM, Mimal leh thildang dangah venhimna hna thawk tura hawh leh hman theih an ni.

He Passing out Parade hmanna hunah hian Pu L.R. Dingliana Sailo, Aizawl SP chu khualzahawm a ni a, Pu Vanlalsawma, President, Executive Protection Squad chuan he hun hi a hmanpui bawk.