Nimin tlai dar 3:00 khan Mizoram Chief Minister Pu Lal Thanhawla’n cheng 158.33 lakhs. senga sak HPC Office Lunglei Chanmari, Liandala Mini Sport Complex cheng 68.92 lakhs. senga siamleh cheng 20.5 lakhs. senga sak Farm Veng Hall a hawng.

Hawnna thu sawiin Chief Minister chuan HPC sum hi dik taka hman a nih avangin Lunglei Dist chhungah hmasawnna tam tak hmuh theih in a awm a. Farm Veng hi in vannei hle a bialtu MLA Pu Joseph Lalhimpuia hmalak na in Liandala Mini Sport Complex leh Hall tha tak in nei hi thalai leh Farm veng khawtlang ten tangkai taka hmang turin a duh thu a sawi. A sawi zel na ah Chief Minister chuan NLUP chuan mihausa leh milian a zawng lova, mi harsa leh rethei, chhanchhuah ngaite, Zoram dung leh vanga awm kuthnathawktute, chhuamchhiate lamin a zawng zawk a ni, a ti. Sorkar laipui pawhin NLUP chu tha a tih em avangin tanpuina cheng vaibelchhe 2800 bakah RKVY hnuaiah pawh cheng vaibelchhe 200 a rawn pek belh thu sawiin Chief Minister chuan NLUP chu mi harsa zawkte chhawmdawlna a nih avangin he scheme hian Pathian malsawmna a dawng a ni, a ti bawk. NLUP dawngtu thahnemngai tak takte tan hlawhtlinna tha zawk an neih theih nan ‘Agriculture Credit Scheme’ leh NLUP kaihkawpa hmalak sak tum a nih thu a sawi a; hemi kaltlangin Bank atangin pung awm mang lova thlai chi hrang hrang chingtute tana loan lak dan tur ruahmanna ‘Kissan Credit Card’ siam sak an ni dawn a ni. Hei bakah hian NLUP leh sorkar scheme hrang hrang kalpui mekte chu thlunzawma, mipuite tan hlawk zawka kalpui tum a nih thu a sawi a. Rampumah Food Security Bill chu pawm a nih tak hnuah Prime Minister hlui Pu Rajiv Gandhi pianchampha phak August ni 20 atangin state zawng zawngah ruahman mek a nih thu a tarlang bawk.

Chief Minister chuan NLUP-in a tum - kuthnathawktute chawikan, ei leh bara intodelh bakah thing leh mau chereu mek humhalh leh tihpun, luihnar kang chat mek leh luipuia tui tlem zel te chhanchhuah hna - te chu khawvel pumin a ngaisangin a ngaihven mek a, khawvela mithiam rualte chuan Mizoramin NLUP a kalpui dan rawn zirchiangin ram rethei dangahte pawh hlawhtling taka kalpui a nih theih an ring a ni, a ti. Sorkar hmalakna avangin Lunglei District-ah ngei pawh hmasawnna hrang hrang hmuh tur a awm zel a, a bik takin thalaite khawvel mila ruahmanna hrang hrang zirna, infiamna leh IT lamah te pawh chak taka kalpui a nih mek thu a tarlang a ni.

Er.Vanlalchhuana, SE, PWD Lunglei Circle in HPC Office sak report pein HPC Office Lunglei hi kum 1990-ah Mizoram Sawrkarin a din a, Office mumal neilo a, mimal in luah hawh a hun engemaw chen a kal hnuah kum 2008 - 2008 atang khan HPC Building sa tur hian bultan ni in sum pawh dahhran tan a ni Sept. 2010 ah sak tan a ni in, May 2013 khan zawh fel a ni. Pawisa hman zah chu cheng 153.33 lakhs.a ni. He building hi chhawng nga a sak a ni. Pu J.Vansangzuala DS&YO chuan Liandal Mini Sports Complex siam report pein he Complex siam nan hian HPC atangin Outdoor a tan cheng 42.42lakhs., MP Lok Sabha  Pu CL. Ruala fund cheng nuai 6, Indoor a tan RD atang in 17 lakhs. MP Lokh Sabha Pu CL. Ruala Fund cheng 2lakhs. leh Public Contribution 1.5lakhs. Total 68.92lakhs sen a ni. Fram veng hall sak nan cheng 20.5lakhs. senga sak zawh a ni bawk.

Inkhawm kaihruaitu Pu Joseph Lalhimpuia, Vice Chairman HPC chuan Pu Lal Thanhawla sawrkar ah Farm Veng in hmasawnna tam tak hmuh theih in a awm a, UD&PA Minister Pu Zodintluanga’n chenna in neilo chhungkua 26te in a sak sak a, Pu S. Laldingliana Parliamentary Secretary chuan Health Sub-Centre a sak sak a, Pu NK Chakma in Market shed sak nan Vety ram a sah thlak sak a, RMSA School din a ni bawk a ni a ti. Pu V.Sapchhunga IAS,LungleiDCleh Secretary HPC chuan lawmthu a sawi